Ralzaam pawl kan ti khawh tawk in kan bawmh rih ko hna lai tiah Mizoram fimcawnnak Minister nih a chim

The Chinland Post | 2022 September 6 – Myanmar ram dirhmun ruangah Mizoram ah a va dormi Myanmar ralzaam hna caah Mizoram nih innka kan awn zungzal i atu cozah siseh, biaknak lei siseh, mipi phu in siseh bawmhnak kan pek ko hna tiah Mizoram fimcawnnak Minister Pu Lalchandama Ralte nih a chim.

American ram North California ah Chin Community USA (CCUSA) hruainak in September 2-4 tiang tuahmi Lai Tho puai ah Special Guest in a kaimi Mizoram fimcawnnak Minister nih Mizoram chung ah aa dormi ralzaam kong he pehtlai in a rak chimmi a si.

Mizoram ah aa rak dormi ralzaam hna him tein an um khawhnak hnga camp kan dirhpiak hna bantuk in ralzaam hngakchia 6,000 deng zong cacawnnak nawl kan pek hna i atu bantuk thil kan tuahnak a ruang hi zeidang ruangah siloin u le nau kan si ruangah a si tiah a chim.

“Cheukhat nih umnak an tawlrel piak hna, eidin an bawmh hna, Mizoram fimcawnnak Minister a simi keimah dirhmun in ka chim duhmi cu Myanmar ralzaam hngakchia hna an zapi in ca kan cawmter hna, Atulio Mizoram cozah nih sianginn a kai termi hngakchia 6,000 deng zokhenh an si. Sianginn thuam, cacawnnak cauk, chuncaw hna zong cawm an si, hi thil vialte zeiruangdah kan tuah tiah nan kan hal a si ahcun u le nau kan si ruangah a si ko. Fimthiamnnak a sungmi le ṭihphannak in a ummi kan unau pawl him tein ca an cawn khawhnak hnga Mizoram mipi, cozah nih nanmah caah a zungzal in innka a awn ko, a si khawh chungin kan tuah rih ko lai timi kha hika hmun in chim ka duh” tiah Mizoram fimcawnnak Minister nih a chim.

A sau tukmi tuanbia tangah miphun khat u le nau kan si i vawlei pi ramkhel ruangah Myanmar-India-Bangladesh tiah ṭhencheu in uk kan si bantuk in Myanmar ram a phanmi kha Chin miphun, India a phanmi kha Mizo miphun tiah kan i au ko hna nain a taktak ahcun miphun khat nu le nau kan si tiah a chim fawn.

Mizoram cu a luancia 1966 ah India sin in zalonnak an hmuh khawhnak hnga hriamtlaih dothlennak an rak tuah i culio caan ah India cozah nih Mizoram mipi hna cungah phun tampi in nuhrin covo an buar i Mizoram mipi tampi zong Chin ramkulh lei ah an rak zaam i culio caah zongah Chin miphun hna nih lunglawm tein an rak don hna tiah Mizoram Minister nih a chim.

Myanmar ram ah hramhram in uknak lak a si hnu ah SAC ralkap nih nuhrin covo a buarmi, thahnawnnak pawl ruangah Chin ramkulh le Sagaing ramṭhen Kalay peng mipi tampi cu Mizoram ah an i dor.

Northeast India ah a ummi Mizoram cu India cozah nih pressure (hnahnawhnak) tampi a pek ko nain Myanmar ralzaam hna phunglut tein a cohlan hna i bawmhnak a pemi ram a si.

Atulio Mizoram ah Myanmar ralzaam 40,000 hrawng an i dor i Mizoram cozah nih a tawlrel piakmi hna camp ah a tlamtlinnak in an um bantuk in mah tein inn a hlangmi zong an um.

Na ruahning rak langhter ve.. (Leave a comment)

%d bloggers like this: