June 17, 2024

Chin Ngakchia Pakhat Mual Liamnak Nih Kansas City Minung Tampi Lungfahter

0

TCP-Online| 2018 July 12|  Kum 17 lawng a si rihmi Chin ngakchia Om Kee Hata cu ralzaam dirhmun in US ram Kansas ramkulh Kansas City ah a farnu, a pu le hringtu a nu tiin khua an sa hna. Om Kee Hata cu a luancia July 7 ni khan Miami pengkomh Hillsdale tikulh ah ti in a rak paam.

A ruak an hmuh tikah palek lei nih cun ruahlopi ah ti in a paam mi a si tiah an fehter. Hiti Chin ngakchia pakhat ti in a paam tikah a umnak hmun Kansas City i cozah muilang thawngthanhnak kip ah an thlah zamh i an ngaihchiatnak zong an langhter hna.

Ome Kee Hata hi sianginn khar paoh ah a umnak hmun Company pakhat ah tangkaa kawl in rian a tuan tawn. Rian a tuannak hmun Company an President simi Bobbi Baker Hughes zong nih a ngaihchiatnak a langhter.

“Ome Kee Hata hi chungkhar pawcawmnak ruah ah kan Company hin rian a rak tuan. Rian a luhka in a riantuan ning hna zoh tikah duh nung tukmi a si. Hringtu a pa hi cu Kawlram ah a um ko. Tubantuk in mino thiamnak ngeimi pakhat nih mual a kan liamtak cu kan khua Kansas hrim kan sung tuk ee” tiah a chim.

Hringtu a pa nih hin a nu cu a rak vuak lengmang caah hringtu a nu hi awlokchong vansang in a fale he ralzaam dirhmun in a rak phan mi an si tiah US ram thawngzamh hna nih cun an tial.

Hringtu a pa zong hi nikhat khat cu US rak phan in chungkhar tling nuamte in khua sak ding a saduhthahnak kong a rak chimmi zong Kansas City i lente aa celhnak Football Team Manager Mariya Goodbrake zong nih Media sinah a chim.
Ome Kee Hata hi pumpuluh chuih zong a thiam takmi a si i a sianginn a kainak Kansas City East High School zong ah pumpululh chuihnak in laksawng zong a co tawntu a si. Tubantuk in ti in a paam tikah a umnak Kansas City Mirang minung tampi zong an lungh a rak fak cio i an sin lonak Media sin hna ah an chim.

A ruak cu July 14 ah vui an timh i a ruak suannak caah hin Kansas City minung hna nih Dollar thong 20000 dih dingh in timhlamhnak an ngei.
Ref: VOA

About The Author

Na ruahning rak langhter ve.. (Leave a comment)