Kanpetlet Le Matupi Peng Mee Thla Khotu Cazin An Taar Cang; 2015 Nakin An Tam Deuh
chin state hluttaw
City Hunter| 2018 July 10| Aralaimi November 3 ah tuahdingmi caankarlak thimnak caah Kanpetlet peng Pyithu hluttaw le Matupi peng ramkulh hluttaw No.1 thimfung in mee thla khotu ding cazin cu July 9 in an taar cang, 2015 kum thimnak lio nakin an tam deuh tiah kan theih.
Hi kong he pehtlai in Chin ramkulh thimnak commission lutlai U Lin Kyaw nih, “Caankarlaknak thimnak caah Kanpetlet peng Pyithu hluttaw le Matupi peng ramkulh hluttaw No.1 mee cazin cu July 9 in 22 tiang kan tar cang. Aa palhmi a um kho, a baumi a um kho. Cazin kan tarmi ning in mee pe khotu cu Kanpetlet peng Pyithu hluttaw mee hmunhma ah milu 12,500, Matupi peng ramkulh hluttaw mee hmunhma ah milu 17,500 an si” tiah The Chinland Post ah a chim.
2015 thimnak lio ahcun Kanpetlet peng Pyithu hluttaw in thimfung thla khotu hi 11484 an si nain mee thlami 9663 lawng an rak si. Cu bantuk in Matupi peng ramkulh hluttaw No.1 in thimfung thla a rak khotu hi 16445 an si i mee thlami 12864 lawng an rak si. Tutan caankarlak thimnak cu 2015 kum nakin an tam deuh cang tiah theih a si. Atu July 9-22 tiang an tarmi mee thla khotu cazin cu ahran (a tlangpi) lawng a si rih. A ralaimi October thla ahkhin cazin adik deuhmi an tar than te lai tiah theih a si.
Thimnak aa cuhtu ding palai min cazin pek caan hi July 2 in 11 tiang lawng onh a si. Hi chung ah aa cuhtu ding palai cazin aa fiang dih te lai. Min cazin pekmi zuhlaak (hrawh) than duh ahcun July 13 ah a hnu bik laak le hrawh than ding a si lai. Thimnak aa cuhtu ding palai min cazin pekmi cu July 16-22 tiang commission nih chekhlat an tuah lai.
Kanpetlet le Matupi peng ah caankarlaknak thimnak an tuahnak ding a ruang cu; 2015 thimnak ah MP a tlingmi Matupi peng ramkulh hluttaw No.1 in MP Pu Hung Kheng (NLD) le Kanpetlet peng Pyithu hluttaw thimfung hmunhma in MP Pu San Khin (NLD) cu hluttaw rian an tuan cuahmah lio ah an thih caah anmah zatka airawltu ding palai thim a hauh than caah a si.
Chin ramkulh ah MP thutdan 39 a um. Hi chung in 2015 kum thimnak tuah lio ah party kip in MP thutdan an hmuhzat cu; NLD nih MP thutdan 28, ZCD nih MP thutdan 6 le USDP nih MP thutdan 5 an hmuh. +++
About The Author
