March Thla Chung Ah Hakha Innhmun 1000 An Samh Chap Lai
City Hunter| 2018 March 2| Kawlram Vice President Henry Van Thio forhfialnak le biacahnak in atu March thla chung, Hakha ah innhmun thar samhnak rian an awt colh than lai. Innhmun hi ekah 500 velchum, innhmun 1000 hrawng chuak ding in samh an timh tiah kan theih.
Hi kong he pehtlai in Chin ramkulh hluttaw speaker Pu Zo Bawi nih atu bantuk in The Chinland Post ah a chim.
“Naite Vice President Henry Van Thio Laitlang a tlawn lio ah khan Hakha innhmun ngei lo, mizapi caah ekah 500 a kaumi innhmun rak samhpiak chap hna uh. Hakha ah inn ngeilo, innhlang le miharsa an tamtuk pin ah Hakha cu Chin khualipi a si caah innhmun hi tampi samh a hau. Khuanu khuapa le tuanvo ngeitu cozah upa he ceihmainak rak ngei ulaw a rannak in innhmun thar samhnak rian hi rak tawlrel uh ti in bia a kan cahtak. Cucaah, Vice President Henry Van Thio biacahtakmi cu tuthla (March) chung ah innhmun cawhnak le sersiamnak rian kan thawk colh cang lai. Atu lio te hi innhmun cawh le vawlei tonghtham caan te zong a si fawn. Tuanvo ngeitu upa hna he zong a herhning in khuakhan lairel tonpumhnak kan ngei colh ve lai.”
“Ekah 500 kauh chap ding a si caah hi chung ah innhmun 1000 hrawng a chuak lai. Innhmun 300 hi inndawh deuh, tlakrawh inn tibantuk a sa kho dingmi kha ks. sing 20 asiloah sing 30 tibantuk in kan zuarh hna lai. Cun, a taangmi innhmun 700 cu inn ngeilo miharsa, innleng caah a si lai. Hi innhmun thar samhnak ding budget a um lo caah innhmun kan zuarmi le innngei lo miharsa sin in ks. 50,000, asiloah ks. 100,000 tibantuk lawmman kan hmuhmi hin innhmun samhnak, lam le sul tuahnak tibantuk a herhmi pawl hman an si te lai. Atu kan thawk colh lai i thal chung ahcun innhmun phawtzamh khawh dih an si ko lai” tiah Pu Zo Bawi nih a biapeh ah a chimchap.
Hakha, innhmunthar samhnak caah cozah nih budget sing 2600 an pek hna. Cu budget in cun ekah 100 hmun an samh i innhmun 200 tluk a chuak. Hi innhmun thar samhmi ah ks. sing 2600 cu an hman dih cang. Cu innhmun samhmi vialte cu innngei lo innhlang, nuhmei, pastor tibantuk then in hmun sokter le mee zuhter an si. Mee zong an zuh dih cang nain Chin ramkulh cozah nih bu nih fehternak an tuah rih lo caah mee zuktu (innhmun ngeitu) sin ah phungningte in innhmun pek an si rih lo tiah kan theih.
Atu innhmun ekah 500 samh chap than dingmi hi tualchung media pakhat nihcun Vice President nih March 1, Chin ramkulh hluttaw sin ah ca a kuat tiah a tial. Sihmanhsehlaw, hi innhmun samh chap dingmi cu amah Vice President pumpak Laitlang a rak tlawn lio ah bia a cahtakmi hna a si tiah Chin ramkulh hluttaw zung in kan theih.
Hakha khuapi ah inn 7000 tluk a um, milu in 30,000 tluk kan um. Hi chung ah inn ngeilo in mi inn a hlangmi hi innchungkhar in 4000 renglo an si. Atu lio Hakha innhlan man hi inn pakhat ning pi in hlan ahcun thlakhat ah ks. sing 7 (700,000) tiang a phan. Buaktlak in innkhan hlan man hi ks. 200,000 hrawng a si. Dawrkhan fate pakhat hlan man hmanh hi ks. 100,000 -200,000 kar an si. Inn hmun hi ks. sing 5000 tiang an i zuarh in an i caw. Zapi zaran innhmun cu ks. sing 200 -500 kar an si tiah kan theih.
About The Author
