Chin Ramkulh Cozah Nih Taungzalat Times Journal An Chuah
Salai Ngun San Aung| 2018 February 19| Chin ramkulh cozah nih cozah tangka hmang in thal fatin chuak Taungzalat Times timi thawngthanhca (Journal) kawlca in tial mi an chuah.
Hi kong ah Chin ramkulh cozah phu chimrelnak nawlngei Sipin Minister Salai Isaac Khen nih, “thil dang zei hmanh tinhchih mi kan ngei lo. Cozah rian tuan nak pawl mizapi sin ah thanh ding saduhthahnak he kan tuah mi a si ko. A zalong mi media, Mizapi media tibantuk zong tuah cio ko ulaw Cozah zong nih cun a duh le a tuah ve awk si ko. Chin ramkulh cozah nih biatak tein tuanvo lak in a tawlrel lai. A bi kina a tlangtla tu ding cu Pianciayee an si lai. A bik in Chin ramkulh cozah nih kumkhat ah budget zeizat dah a hman tibantuk le zung kip nih an tuahmi te te kha kan thanh lai. Cun mi zei paoh nih zalong tein hi journal ah ca tial khawh cio a si. Pumpak soisel le dohkalhnak tu cu kan cohlang lai lo” tiah a chim.
Chin Media Network chungtel pakhat nih, “Ramkomh Myanmar ah cozah tlaih mi Kyemone, Myanmah Alinn tibantuk pawl hmanh hi ngol cang ding le Pianciayee zong hi media bantuk in hman lo ding ah media zalonnak leikap in au pi cuahmah lio ah Myanmar ram chung ah Rakhine ramkulh cozah le Chin ramkulh cozah lawng hi journal a chuahmi an si. Hi thawng ka theih cu ka khuaruah a har. Thawngthanhca chuah timi cu cozah rian a si lo. Cozah a rian cu zalong tein mizapi nih thawng an theih khawhnak hnga media rian a tuan mi pawl thazaang thawnter kha a si. Cun Media timi cu, biaknak, khrihfabu, mibu pakhat kha tibantuk tlaihhip nak tang ah um loin zalong tein a dir mi a si lai ti a si. A ruang cu kap ngei lo tein thil a dik ning tein mizapi sinah a thanh khawh nak ding caah a si. Tu hi Chin ramkulh hluttaw nih an ton pumhnak chung ah media an kan luh ter lo. Cozah sin zong ah kan duh ning tluk in thawngpang kan la kho lo. Cu bantuk lio ah anmah cozah nih thawngthanhca an chuah ve ahcun Media caah har nak tampi a chuak chin chin kho. Cun cozah pakhat nih thawngthanh ca a chuah ti hi cu Democracy hruaimi cozah he 100% bak aa kalh tiah ka hmuh” tiah a hmuhning TCP ah a chim.
Taungzalat Times cu February 19 in Hakha ah an phawt cang lai. Hakha holh in tlap khat kan telh lai i duh sah in thla khat hnu thla khat Falam holh, Khumi holh tibantuk in tlap khat te te in an chuah chih lai tiah Sipin Minister Salai Isaac Khen sin in kan theih.
Hakha Post Chief Editor Papui nih, “hi an chuah lai mi hi a zalong mi media a si lai maw a siloah Cozah nih a tlaihmi hna a si sual lai maw? Cun cozah tangka hmang in maw an chuah lai zeitindah a si hnga? Cozah tangka timi cu mizapi tangka a si. Cun hi tangka an hmuhmi hi zei ah dah an hman lai i zeitin an tawlrel ning asi lai ti hi hngalh ka duh ngai. Media phu pakhat ah a biapi mi cu editorial hi a si. Cu editorial cu zeitindah an kal pi ning asi lai ti hi ka fiang lo ngai. A tawlreltu hi hodah an si lai? Hluttaw nih maw a tawlrel lai cozah phu nih dah a tawlrel lai ti zong ruah awk a um i Cozah riantuannak kong a thanhtu media kan um ko i Chin media pawl kha a zumh hna lo bia maw, Chin media pawl kha chin ramkulh cozah thawngpang kha a pek duh hna lo bia maw? An thanhmi aa relh lo, a lungtling lo dah asiloah Chin media pawl kha zuamcawh hna a duh hna. Cucu ruah lo awk a tha lo mi a si” tiah a chim.
Taungzalat Times ah tuanvo latu ding upa hna cu, CEO- Sipin Minister Salai Isaac Khen, Admin-U San Htun Sein (Chin Ramkulh Cozah Director), Advisor Editor-U Kham Lian Sun (Pianciayee ramkulh lutlai), Advisory Board-U Khin Mg Kyaw (Chin ramkulh cozah phu Secretary) le Dr. Run Bik, Chief Editor-Htun Awi, In Charge Editor-Hnin Si Thakhin, Editor-Toe Nay Chi, Art Advisor-Way Luh Kyaw le Tu Htoo San, Distribution tlaitu-Salai Martin Tuang le Pum Khanh Nuam, Design- Watung, Computer catialtu-Salai Glory Moe, Staff-U Yaw Minn Htun, Daw Ding Chianh Hoi, U Shan Do Sang, Printing-Tingtan Oo Printing hna an si.
About The Author
