Zahnak Nih Thantlang Peng Tlangthluan Pumpululh Chuih Champion An Laak

City Hunter| 2018 February 19| February 13 in Thantlang peng, tlangthluan pumpululh chuih zuamnak cu an thok i February 19 ah Final a kaimi Zahnak le Nichuah Zophei an i tong, penalty (fanelti) in Zahnak nih champion an laak.

Nichuah Zophei nih kawlkhat an sut hmasa hna. Puai a dih laite second 50 hrawng aa duh ah Zahnak nih kawlkhat an sut ve hna caah an i tluk. Caanhlei (overtime) minute 30 chung an chuihter than hna i an i kawl khawh lo caah an i tluk. Cu dih hnu ah penalty an chuihter hna. Penalty in Zahnak nih 3-1 in an tei hna.

 

Minute 90 chung an chuihmi an i kawlmi fonh in Zahnak nih Nichuah Zophei cu 4-1 in an tei hna caah atu bantuk in champion an co hi a si.

Hnukham thiambik laksawng cu Nichuah Zophei in Cung Bawi Hup nih a co. A laikal thiambik cu Vailam in Ram Hei, Hmaikal thiamnak cu Nichuah Zophei in Zidan Thang, puai zapi i a thiam bik laksawng cu Zahnak in Tial Thawng, Kawlbawh thiambik cu Zahnak in Biak Ceu Lian le kawl tambik a sut khotu laksawng cu Vanzang tlang in Sang Awi nih a co. A thiam bik laksawng pawl hi trophy laksawng pek an si.

Zahnak nih pakhatnak laksawng ks. sing 5, seal le medal pakhat cio an co. Nichuah Zophei nih ks. sing 3 le medal pakhat cio. Semi final a kaimi Vailam le Nitlak Zophei zong ks. 50,000 veve laksawng an pek hna. Pakhatnak le pahnihnak laksawng cu February 20, Chin Miphun Ni caanhmannak ah laksawng pek an si te lai. Atu bantuk tlangthluan pumpululh chuih zuamnak cu kum fatin te tuah ding in tuanvo ngeitu upa hna nih biakhiahnak an tuah tiah kan theih.

Thantlang peng ah tlangthluan pa 9 an um. Cu hna cu; Nichuah Zophei, Nitlak Zophei, Lautu, Mara, Vanzang, Bual, Khualhring, Vailam le Zahnak an si.+++

Na ruahning rak langhter ve.. (Leave a comment)

%d bloggers like this: