Chin Ramkulh Fimcawnnak Zung Riantuantu Nu An Zung Riantuanti Pa Nih A Velh
City Hunter| 2018 June 19| Chin ramkulh fimcawnnak zung ah riantuanmi nu pakhat cu an zung riantuantu pa nih June 18 chun, zung chung ah a velh tiah kan theih.
Hi kong he pehtlai in velh a tongmi Van Dawt Hnem (kum 22) cu The Chinland Post nih pehtlaihnak kan tuah i atu bantuk in a kan leh.
“June 18 chun ah CB bank ah kan kal. CB bank in zung ah kan rak tin. Kan zung riantuantu dang chuncaw an eikar a si. Zeihmanh i siknak zong kan ngei lo, thlalang kaa bih lio ah a ka bengh, cun, voi tampi ka hmai le ka lu ah a ka thongh. June 19 cu zung zong ka kai kho lo. Amah hi zuu a ri tuk. A ka veltu Siang Muan Sang hi kanmah zung riantuan vemi a si. Tedim a si i a min cu Siang Muan Sang a si. Amah hi sianginn kaiti khat zong kan si. Zuu a rit bu he atu bantuk in a ka velh hi a si.”
Velh a tongmi chungkhar lei in tuanvo ngeitu Pu Biak Kung, “Atu bantuk in velh kan ton cu kan ngaih a chia ngaingai. A veltu Siang Muan Sang zohkhentu chungkhar nih June 18 zanlei ah khan a rak kan len, ngaihthiam a rak kan hal. Cun, June 19 zingka ahkhan anmah Cimnuai Khrihfabu upa le pastor te nih an rak kan len than. Cu ahcun mi veltu Siang Muan Sang zong aa tel ve. Kanmah chungkhar lei nihcun nu lei kongkau in siseh, mivelhnak le zunglei kongkau zong in siseh zuurit bu in a velhmi a si caah tazacuai kan tim hna lo. Hi bantuk thil a chuah than ti nakhnga lo le a chuah than sual ahcun timi bia bauhtakmi belte kan ngeihtak” tiah The Chinland Post ah a chim.
“Zei paoh a si ah zung riantuanti khat kan si ca le Khrihfa veve kan si caah tazacuai kan tim hna lo. Taza kan cuai ahcun a rian an phuah lai. Rian ngah a tuk pin ah amah hi tanghra awng zong a si fawn lo caah taza cuai kan tim lo, kan ngaihthiam ko hna. Asinain, atu hi kan zung lutlai bik kan Pi khual a tlawn kar a si caah zeitindah kan zung nih an tuah te lai cu ka hngal lo. Nihin (June 19) in khan caan karlak chung zung in an dinhter caah zung kai lo in a um rih. Kan pi a rak tlun tikah zeitindah biakhiahnak a tuahpiak te lai cu ka hnga lo” tiah velh a tongtu nih a biapeh ah a chimchap.
Siang Muan Sang hi Tedim a si, a nu le a pa aa then cangmi an si. A ngakchiate in Hakha ummi a pi nih a cawm, a pi cu Pi Kim Pi a si tiah kan theih.
Min langhter a duh lotu cozah riantuantu pakhat nih, “Hi bantuk zuu rit bu in zungkai le mi velh a hmangmi Siang Muan Sang hi a ingtuartu chungkhar nih taza an cuai lo zong ah zung lei nih a rian an phuah awk le dan an tat awk hrimhrim a si. Cozah riantuantu dang vialte nun chimhnak ca hrimhrim ah dan an tat awk le a herh ahcun a rian tiang an phuah awk bak a si. Cozah riantuantu zulhphung a buar zong a si fawn” tiah The Chinland Post ah a chim.
Van Dawt Hnem (kum 22) hi pasal ngei cangmi a si. Van Dawt Hnem hi Chin ramkulh fimcawnnak zung ah rian a luhnak hi kumkhat hrawng lawng a si rih. Chin ramkulh fimcawnnak zung ah zung rian bawmtu a si. Amah hi Hakha peng, Zokhua mi Pu Za Uk (tleicia) le Pi Dar Ci fanu a si. Unau pali chuak an si, nu pathum le pa pakhat an si. Nu pathum lakah a hniang bik a si.
Biakilh: Van Dawt Hnem chungkhar le sining kong hi anmah chungkhar hnatlaknak he langhter mi a si.
About The Author
