Chin Ramkulh Kumkhat Chung Ah Kumtling Lo Ngakchia Tlaihhremnak Voi 16 A Chuak
Salai CungCung|2019 September 5| Chin ramkulh chung 2018 September thla thawk in 2019 August thla tiang kumtling lo ngakchia tlaihhremnak voi 16 a um cang i tam deuh cu Chin nunphung ning in aa ngaithiam mi an tam hna tiah KMSS Chin ramkulh zung cazin ning in kan theih.
“Chin ramkulh chung ah hin kum tlinglo ngakchia tlaihhrem a tam ko nain zapi nih kan theih tuk lo nak a ruang cu, kan mah kan hmuhton ning ah cun, tlaihhrem a tong mi kumtling lo ngakchia tam deuh hi nu le pa he a um ti lomi an tam, chungkhat sin um mi le theihhngalh sin ah um mi tibantuk hi an tam. Cu a si caah Chin nunphung ning in Vok maw, Naa maw, tangka in maw tibantuk pek in an i ngaithiam mi hna an tam. Cucaah Palek lei nih a hmuh (Case) tuah duh zong ah tuah khawh a si lo, cozah sin zongah Case tuah khawh a si lo, kan mah lei zong nih tuanvo lak piak kan duh ko hna nain kan tuah piak ko hna lo” tiah KMSS Chin ramkulh zung in Manager nih a chim.
Kum tlinglo ngakchia tlaihhremnak hmun pawl cu, Hakha peng ah pa 3, Mindat peng ah pa 4, Matupi peng ah pa 3, Tonzang peng ah pa 2, Tedim peng ah pa 3, an zapi 13 a si i pa 3 lawng hi Case tuah khawh mi an si. A tang mi cu Chin nunphun ning in pakhat le pakhat an i ngaithiam hna tiah kan theih.
“Hi bantuk pakhat le pakhat Chin nunphung ning in an i ngaihthiam mi hi cu thil tha lo ngai a si. Kan mah Chin nunphun ningin lainawng le mithat hna zong ngaihthaimnak an tuah ko nain hi bantuk cu aa khat lo, Cun ngaihthiam ding an va hal hna i an duh lo tikah Pastor te hna an i sawm hna, Cu tik ah ngaithiam duh lo zong ah Pastor mithmai zoh in ngaihthiam duh lo zong ah an o ngaithiam hna. Cu tik ah ngakchia caah a tang rih mi a caan vialte cu hawi hmai ah a lumsa ti lo, Cu ngakchia nu te a nun cu tangka Sing 5, Sing 10 man in zuar mi bantuk a lo cang, Cun mi va tlaihhrem zong ah ngaihthiamnak a um than ko lai ti zumhnak an ngei sual lai ti ka phang, Chin ramkulh Hluttaw lei zong hi bantuk Upadi hi kan remh piak hna seh law ti ka duh” tiah a chimchap.
Hi kum tling lo ngakchia tlaihhrem a tongmi hna lak ah tam deuh cu kum 10 tang deuh lawng te an si i pa pakhat telh in a dang cu nu lawng te an si tiah kan theih.
(Ref:Chin World)
About The Author
