June 21, 2024

Chin Ramkulh Minister Cheukhat Rian Dinhter Le Rian Thlenremhnak Biathli

0

Chinram cozah bu

Salai Holy Tawk Tling Thang| 2018 May 8| Chin ramkulh minister cheukhat rian dinhternak le rian thlenremhnak kong he pehtlai in Chin ramkulh hluttaw Speaker hmurka in media sin ah bia a phunphun a chuak. Aho dah rian dinhter a si lai? Minister pathum min a chuakmi hi zeitindah rian an i thlenremh ning a si lai? timi Chin ramkulh minister rian dinhternak le an rian thlenremhnak kong biathli thup hun zohti hna usih.

Hluttaw Speaker Pu Zo Bawi Nih Zei Bia Dah A Chim?

Chin ramkulh cozah bu chung in minister riandinhternak le rian thlenremhnak kong ah Chin ramkulh hluttaw Speaker Pu Zo Bawi biachimmi aa hnihthum dih. A hmasa bik 7Day news ah minister pakhat riandinhter kan timh tiah a chim. Cu hnu ah Chin World media ah minister cheukhat riandinhter an si kho, ahodah a si lai timi aa fiang rih lo tiah a chim. Cun, Akonthi media ahcun, “minister pathum thlenremhnak kan tuah lai. Cu hna cu Minister Salai Isaac Khen, Minister Pu Sui Thio le Minister Pau Lun Min Thang an si. Chief Minister nih President sin ah ca a kuat cang nain a kan let rih lo” tiah a chim. Cu bantuk in RFA zong ah Akonthi media sin ah a chimmi minister pathum kha thlenremhnak tuah ding in President sin ah Chief Minister nih ca a kuat cang” tiah a chim than.

Chin ramkulh hluttaw Speaker Pu Zo Bawi

Hi kong he pehtlai in Chin ramkulh Hluttaw Speaker Pu Zo Bawi nih, “Chin ramkulh cozah bu chung in minister riandinhter ding le dinhter lo ding kong cu aa fiang rih lo. Dinhter zong a si kho i dinhter lo zong a si kho. Dinhter a si hmanh ah ahodah dinhter a si lai timi zong a fiang rih lo. A rauh hlan ah mizapi nih biafang nan theih te ko lai” tiah March 7 chun, The Chinland Post ah a chim.

Media dang sin ah a chimmi biafang pawl kan hun hal than tikah a kan let duh lo. Aa fian tikah nan hngalh te ko lai tiah a kan ti. Hluttaw Speaker Pu Zo Bawi cu atu hi Naypyidaw ah meeting va kai ding in May 8 zingka te ah aa thawh cang. Chief Minister Salai Lian Luai zong thaizing khi Naypyidaw lei ah aa thawh ve lai tiah Chin ramkulh hluttaw zung in tuanvo ngeitu pakhat sin in kan theih.

Hluttaw Speaker Pu Zo Bawi nih, “Rian an tei lo ruang le an riantuanmi a nuarh tuk ruang ah rian thlenremhnak tuah kan timh hna hi a si” tiah media cheukhat sin ah a chim.

Minister Cheukhat Nih Zeibia Dah An Chim?
Chin ramkulh minister rian dinhternak le rian thlenremhnak kong he pehtlai in The Chinland Post nih May 7 le 8 ah Minister Pu Sui Thio le Minister Pau Lun Min Thang pehtlaihnak kan tuah hna i atu bantuk in an chim.

Minister Pu Sui Thio

Minister Pu Sui Thio, “Minister rian dinhter an timh timi cu kei zei hmanh ka hngal lo, atu hi Naypyidaw ah ka um. Sihmanhsehlaw, Chin ramkulh cozah bu nih rian kan tei deuhnak ding le rian kan tlamtlinh deuhnak ding rian thlenremhnak kong hi hluttaw Speaker nih cabinet ceih ding in tuandeuh pi ah a chuahpi cang. Rian thlenremhnak tuahding kong kan ceih i kan buai taktak, cun, cunglei ah ca an kuat i nihin tiang ca an kan let lo. Cabinet zong nih kan ceihmai than ti lo. Cuti ca a kan leh lonak a ruang pakhat cu rian thlenremhnak tuah kan duhnak a kong langhter chih a si lo ruang ah a si. Hi rian dinhternak le rian thlenremhnak cu a rauh hlan ah a phi chuak lai i zapi nih nan hngalh te ko lai. Atu ahcun thil sining fiangte in chim awk a tha rih lo” tiah The Chinland Post ah a chim.

Minister Pau Lun Min Thang nih, “Chin ramkulh Minister cheukhat riandinhter timhnak kong cu zeihmanh ka hngal lo. Rian thlenremhnak kong belte cabinet ah kan ceih bal. Cu kong cu Chief Minister nih President sin ah ca a kuat rua. Zeitindah rian thlenremh a si lai timi belte cu ka hngal lo” tiah May 8 zingka, The Chinland Post ah a chim.

Minister Pu Sui Thio le Minister Pau Lun Min Thang nih The Chinland Post ah an chimmi bia zoh than tikah hin rian thlenremhnak tuah an timh taktak ko timi fiangte in hmuh khawh a si. Amah belte cu rian dinhter a um lai le um lai lo cu chim awk a har ngai rih.

Minister Salai Isaac Khen hi May 7 ah pehtlaihnak kan tuah nain aa manh lo tuk caah kan tong kho lo. May 8 ah phone in pehtlaihnak kan tuah nain phone a tlai duh lo. Asinain May 7 he 8 he zung tu cu caanhmaante in a kai ko. Minister Pau Lun Min Thang zong caanhmaante in zung a kai ko.

NLD Party Upa Cheukhat Nih Zeibia Dah An Chim?
Chin ramkulh NLD Secretary zong a si i hluttaw Speaker bawmtu zong a simi U Aung Taan nih, “Minister cheukhat riandinhter an timh timi kong cu zeihmanh ka thei lo, rian dinhter ding in hluttaw le party nih zeihmanh ceihmainak kan ngei lo” tiah The Chinland Post ah a chim. Cu bantuk in Chin ramkulh NLD party (EC) chungtel a simi Pu Siang Hu zong nih, “Chin ramkulh Minister cheukhat riandinhternak le rian thlenremhnak kong cu zeihmanh kan ceih lo” tiah The Chinland Post ah a chim ve.

Chin ramkulh NLD (EC) upa hna he aa naihniammi Dawrthar sang ummi upa pakhat nih, “Chin ramkulh minister pawl an rian an tei lo caah rian thlenremh tuah an duhnak a sau cang. Cucaah, rian thlenremhnak cu an tuah taktak ko cang lai. Zeitindah an i thlenremh lai le rian dinhter an duhmi pa kha an dinhter taktak lai maw timi ceo khi hngah ding a si ko” tiah May 7 zan, The Chinland Post ah a chim.

March Thla Ah Pu Zo Bawi Nih Zeibia Dah A Rak Chim?
March thla thawkka, The Chinland Post sin ah hluttaw speaker Pu Zo Bawi nih atu bantuk in bia a rak chim cia cang. Hi a chimmi bia cu The Chinland Post thanhca zong ah kan rak chuah cang. Cucu hiti hin a si.

Minister Pau Lun Min Thang

“Kan cozah phu hi an rian aa buaktlak cio lo. Rian a tam deuh mi cu Lamsul lei minister zung le Sipin hi an si. Sipin nih electric, sethmuh, hotel and tourism a tlaih chih caah rian pali a kemh ti nak si. Hihi rian a tam deuh i ruahning in rian hma a kal lo tiah kan ruah caah a rian tlawm tiin kan ruahmi Budget and Planning minister kuttang ah Sipin hi i thial sehlaw ti khi kan ruat. Upa nih an duh cio fawn. Cucaah Cabinet ah kan chuahpi lai i an lungtlin ahcun tu hi Sipin than-nah khi Budget and Planning nih an tlaih chih hnga”.

“Cun, rian hi tei lo ahcun mah te zong in ka rian ka tei lo caah rak ka chawng bang uh ti ding te khi a si ko nain. Tu cu tangka tumtlang deuh a luhnak thannah kha an tei ah tei lo ah an zoh cio i rian hma a kal le kal lo an tuak ti lo. Mizapi kan sung tuk. Cucaah rian hma a kal khawh deuh nak hnga tu hi kan tlangtlak timh hna nak cu a si” tiah 2018 March 8 ah a rak chim.

Hluttaw Speaker Pu Zo Bawi nih March 8 ah a rak chimmi bia kha cabinet ah an ceih i atu bantuk in Chief Minister nih President sin ah ca a kuatnak hi a si lai tiah ka ruah. Cabinet i ceihmainak an tuah lio ah an rak buai ngaingai ti zong theih a si.

March 30, President rian a cohlan ni biakamnak biarocah ah President U Win Myint nih thlennak riantuan a khulnuarmi zung le bu hna cu zohfel le rengh deuh an si lai tiah a chim. Cu pin ah Kumthar biarocah chimnak zong ah thlennek he aa rup lomi riantuantu hna cu a thekvak a tha i a fimmi (quality) hna he thlen herh ahcun kan thlen lai tiah President U Win Myint nih a chimchih. President biachimmi tuanchuahnak ca hrimhrim zong ah atu bantuk in Chin ramkulh minister cheukhat rian thlenremhnak le rian dinhternak kong an tawlrelnak hi a si ti usihlaw kan palh lem lai lo dah!

March 8 lio, Pu Zo Bawi nih minister cheukhat rian thlenremhnak kong The Chinland Post sin a rak chim lio tan ah min langhter a duh lomi tuanvo ngei upa pakhat nih atu bantuk in The Chinland Post ah a rak chim ve.

“Khuapi sersiamnak (town planning) hi sipin nih a tlaih awk a si lo. A tak tak ah cun Uu-Eing nih a tlaih awk a si. Cun atu hi kan khuapi sersiamnak rian kan zoh tikah rian kal a nuar tuk. Hitihin cun zei ngai kan chuahpi kho lai lo. Cucaah Town Planning cu ramkulh le ramthen dang cio bantuk le Minister zung rian an then ning tein Uu-Eing nih tlai hna sehlaw rianhma a kal deuh lai ti kan ruat. Uu-Eing cu Lamsul lei Minister zung nih an tlaih mi a si caah Minister Pu Sui Thio tlaihmi tang ah a si hnga tinak si cu” tiah a chim.

Sipin le Uu-Eing rian kong zong cu a naihniam bik cabinet ah ceih ding in minister cheukhat rian thlenremhnak kong he rak chuahpi chih a rak si. Cu ruang ah a rauh hlan ah Chinram cozah bu chung ah rian thlenremhnak a um hrimhrim lai timi thawngpang cu a dik bakmi a si tiah kan chim khawh.

Zeitindah Rian An I Thlenremh Ning A Si Lai?
Rian thlenremh dingmi minister hna cu; Minister Pu Sui Thio, Minister Pu Pau Lun Min Thang, Minister Salai Isaac Khen an si. An rian hmunhma i thlen ding cu; Pu Sui Thio hmun ah Pau Lun Min Thang, Salai Isaac Khen hmun ah Pu Sui Thio le Pu Pau Lun Min Thang hmun ah Salai Isaac Khen ti in rian an i thleng lai tiah thawngpang a leng. Minister chung ah rian dinhtermi minister a um lo ahcun hi thawngpang a leengmi hi a dik lai tiah catialtu nih ka zumh.

Zei ruang ah ti ahcun 2015 thimnak tuah lio te ah siseh, MP a tlin hnu le minister a si hlan ah Pu Sui Thio cu The Chinland Post nih biaruahnak (interview) kan rak tuah. Minister rian hei in pe hna sehlaw zei rian khi dah ka tuan khawh bik lai ti naa ruah i zei rian dah tuan na duh bik? tiah kan rak hal. Cu lio ahcun Sipin rian hi kaa tlak bik lai, ka tuan khawh bikmi zong a si fawn lai” tiah a rak kan leh. Cu ruang ahcun rian thlenremhnak an tuah taktak si ahcun Sipin rian hi Pu Sui Thio an tlaihter hrimhrim lai ti ka zumh.

Social Affiar Minister rian (thawngthanhnak, nunphung, ngandamnak le fimcawnnak) khi Pu Pau Lun Min Thang nih tlai ti lo in Salai Isaac Khen nih a tlaih lai tiah thawngpang a leengmi zong hi a dik lai ti ka zumh. A ruang cu Social Affair minister nihhin spoke person zong a tlaih awk le a rian hrimhrim zong a si tiah ka ruah. Atu cu Sipin le Electric minister a simi Salai Isaac Khen tu, spoke person a si tikah Social Affair Minister rian zong a tlaih chih ti awk in a um. Minister Pau Lun Min Thang khi Social Affair minister si lo in Ngandamnak le Fimcawnnak minister ceo lawng a tuanmi a hung lo cang. Cun, Spoke person hi Pau Lun Min Thang nakin Salai Isaac Khen nih a tuan khawh deuh tuk fawn lai tiah ka ruah. Asinain Salai Isaac Khen hi tutan result a chuak dingmi ah minister a tuan ti lai maw, riandinhter a si cang lai maw timi chim awk a har ngaingai. Rian dinhter a si lo ahcun mah thawngpang a leengmi ningte in rian an i thleng lai. Cu pin ah a cunglei ah kan langhter cangmi Sipin le Uu-Eing rian tibantuk zong an thlen chih theu lai.

Ahodah Rian Dinhter A Si Kho Bik?

Minister Salai Isaac Khen

Chin ramkulh minister lakah a riantuannak zapi nih theih bikmi hi Sipin le Electric minister Salai Isaac Khen a si i a riantuannak aa hngal lo bikmi hi Budget le Planning minister Pu Vui Kaw a si tiah journalist pakhat dirhmun ka hmuhning a si. Minister Pu Vui Kaw hi cu a rian hrimhrim a tlawm. A rian tam bikmi hi Minister Salai Isaac Khen, Minister Pau Lun Min Thang le Minister Pu Sui Thio an si fawn lai. Minister vialte lakah Sipin le Electric minister hi mizapi nih thatnak in siseh, chiatnak in siseh a kong an ceih bikmi a si tiah ka ruah. A bik in Mindat market, Hakha market le Falam market saknak kongkau ah mizapi nih an ceihphai khun. A rian tlaihmi hrimhrim a tam khun caah rian a tei lo tiah mizapi nih an ceihphainak zong hi a si kho. Mi cheukhat nihcun minister vialte lakah a cawlcang bik, rian thiam bik le a thluak tli bik a si, Chief Minister hmanh a tuan kho ding a si a timi zong an um ve.

Hi ruang ah minister lakah rian dinhter dingmi a um sual ahcun minister pathum lakah hin Salai Isaac Khen hi a si kho bik tiah ka ruah. Zei ruang ah ti ahcun anih hi mizapi thimmi palai a si lo, a leng in laakchommi a si caah rian dinhtermi an um sual ahcun amah hi a si kho bik. Minister rian an pek liote in NLD MP cheukhat hrimhrim an lungtling cia ti lo, kanmah NLD party MP um ko bu in midang minister rian pek cu tiah an rak zai bal cang. Cun, Sipin le Electirc minister lila zong nih a luancia caan ah a herh ahcun ka rian tiang ka chuahtak te lai tiah a facebook cahmai ah a rak i tar bal fawn.

Pu Pau Lun Min Thang hi cu ZCD party a si nain NLD party he hawikomhnak a tuahmi an si ruang le Pu Sui Thio cu NLD party a si pin ah Hakha peng NLD committee ah Secretary pakhat zong a si. Cu pin ah NLD cozah kai hnu in nihin tiang minister vialte lakah Chin ramkulh hluttaw Speaker zong a si i Chin ramkulh NLD chairman zong a simi Pu Zo Bawi he naihniam bik in rian a tuantimi a si caah rian an dinhter lai ka zum lo.

May 14 ah ramkomh cozah bu meeting an tuah lai i ramkomh minister cheukhat le Chief minister pathum rian thlenremhnak an tuah lai tiah Naypyidaw in thawngpang a leeng. Hi meeting tikah Chin ramkulh minister riandinhternak le rian thlenremhnak kong cu aa fiang te lai ti zumh a um bik. Khi tikah phungningte in an thanhchuah theu te lai. Ramkomh cozah zung in Fimcawnnak minister Dr. Myo Thein Gyei zong President hlun U Htin Kyaw nupi Daw Su Su Lwin nih a chaan lai tiah thawngpang a leeng.

Nangtah zeitindah na ruahning le na hmuhning a si ve? Tutan thlanremhnak tuah dingmi hi Chinram le Chin miphun dikfelte in thanchonak a chuahter deuh tu le a khulranter deuh tu si hraam ko seh!

Biakilh: Hi cabia cu catialtu pumpak hmuhning le ruahnak a si.

About The Author

Na ruahning rak langhter ve.. (Leave a comment)