Chin Ramkulh Minister Zung Le An Tlaihmi Rian Thlenremhnak Um Dawh A Si
Salai Ngun San Aung| 2018 March 8| Chin ramkulh cozah phu chung ah minister zung nih an tlaihmi rian aa zat cio lo i, cheukhat cu rian tam hnga deuh an tlaih caah rian hma lungkhan in a kal lo tiin rian buaktlaknak le thlennak a um kho men tiah kan theih.
Chin ramkulh hluttaw speaker Pu Zo Bawi nih, “Kan cozah phu hi an rian aa buaktlak cio lo. Rian a tam deuh mi cu Lamsul lei minister zung le Sipin hi an si. Sipin nih electric, sethmuh, hotel and tourism a tlaih chih caah rian pali a kemh ti nak si cu. Hihi rian a tam deuh i ruahning in rian hma a kal lo tiah kan ruah caah a rian tlawm tiin kan ruahmi Budget and Planning minister kuttang ah Sipin hi i thial sehlaw ti khi kan ruat. Upa nih an duh cio fawn. Cucaah Cabinet ah kan chuah pi lai i an lungtlin ahcun tu hi Sipin thannah khi Budget and Planning nih an tlaih chih hnga” tiah a chim.
Pu Zo Bawi nih cun a pehchap i, “Rian hi tei lo ahcun mah te zong in ka rian ka tei lo caah rak ka chawng bang uh ti ding te khi a si ko nain. Tucu tangka tumtlang deuh a luhnak thannah kha an tei ah tei lo ah an zoh cio i rian hma a kal le kal lo an tuak ti lo. Mizapi kan sung tuk. Cucaah rian hma a kal khawh deuh nak hnga tu hi kan tlangtlak timh hna nak cu a si” tiah a ti.
Mah tein rian ka tei deuh lo caah ka rian ka chawng bang uh ti loin cunglei tlangtlak nak in rian thlennawnnak a um ahcun pumpak ngaihchiatnak hna a um sual lai maw ti mi ruah lo awk a tha lo. Cun cozah nih a za tiin rak pek mi rian tei lo ruang i midang kut ah rian thial piak ding cu limhang a zor ngai ding mi thil a si caah ruah ngai ngai a herh tiah khuanu khuapa chung in upa pakhat nih a chim ve.
Cu kong ahcun Hluttaw Speaker nih, “hihi tuan deuh zong ah kan rak ton bal cang. Asinain rian hma a kal deuh nak cu kan duh i mizapi ca kan tuak fawn tikah kan tuah a herh ko lai” tiah a chim.
Hi kong ah March 7 ah Chin ramkulh Hluttaw Speaker Pu Zo Bawi nih Hakha hlum MP le khuanu khuapa pawl auh in an ceih ruahmi a si i an lung a tlin cio caah a nai bik Cabinet ah ceihchah ding in chuahpi an timh i hnatlak pi a si ahcun a rang bik in rian thlennawnnak an tuah colh lai tiah kan theih. +++
About The Author
