Chokhlei Kut Avoi 1nak Lawngtlai District Ah An Tuah
Salai Elvis| 2018 March 9| Mizoram ah avoi 1nak tuahmi Chokhlei Kut (Rhododendron festival) cu March 8-9 tiang Mizoram Lawngtlai District, Sentetfiang khua ah sunglawi ngai in an tuah tiah thawng kan theih.
Hi puai tuahnak ah khuallian in sawmmi Mizoram Governor LT Gen.(rtd) Nirbhay Sharma PVSM, UYSM, AVSM, VSM nih hunnak a tuah. Governor nih cun “Mizoram i avoi 1nak Chokhlei min te i puai tuah cu a tha ngaingai a ti. A tlam a tlin khawh nak ding thazang a chuahtu vialte cung ah lunglawmhnak bia a chim.
Chokhlei puai cu State puai minthang taktakmi si ve kho dingin ka ruah. Cu bantuk a si khawh nakhnga puai dongtu peng (District) mizapi sin ah a chim.
Lawngtlai East MLA Pu, H. Zothangliana nih, “Chokhlei puai cu vawleicung pumpuluk i puai sunglawi bik a si khawhnak ding le a tlamtlin khawh nakhnga kan Lai nun ziadawh, kan Lai thithuam hna cawisan le kilvennak tha bik a si” tiah a chim.
Atu bantuk in Chokhlei Kut an tuahnak cu Chokhlei Par kilvennak le Tourism cawisannak caah tuah a si. Ani khatnak cu Cultural Program ngeih a si i, a nihnihnak March 9 ah hlasaknak phunphun, Chokhlei Idol thim, Chokhlei King & Queen thimnak an tuah lai. Phawngpi National Park he zong aa naih te tiah teih a si.
Hi puai ah CHOKHLEI IDOL zong zuamnak tuah a si lai i Pakhat nak(Rs 10000) 200,000 MMK pahnihnak (Rs. 7000) 140,000 MMK le pathumnak (Rs. 5000)100,000 MMK a si lai. Mizoram nih a tubantuk in puai pipa an i ngeihmi cu Chapchar Kut, Hlukhla le a voikhatnak tuah mi Chokhlei Kut hi an si.
Ref: Chanchinthar World News
About The Author
