Thantlang Khuahcung Sathahnak License Cawkzuarnak Tu Thla Chung Ah An Tuah Lai
Salai Elvis| 2018 March 8| Thantlang khuachung le Hnaring khua sathahnak hmunthum cu March 13 zinglei suimilam 10:00 ah cawkzuarnak (le-laan) an thawk cang lai tiah thawng kan theih.
Hi sathahnak cu Thantlang khuachung ah hmun 2 le Hnaring khua ah hmunkhat tiin then a si. 2018-2019 kumkhat caah sathahnak license cawkzuar dingin rikhiah mi cu; Thantlang khuachung Biakinn sang Sasen (sing 3,275,000) Vok thahnak (ks. 5,300,000) le sianginn sang sathahnak hmun Sasen (ks. 1,325,000), Vok thahnak ( ks. 2,005,000) le Hnaring khua caah Vok thahnak lawng (ks. 505,000) an si.
Mah pin ah a dang tein Saphaw (taa-zi) License tuah a si ve caah (ks. 200,000), motor le cycle khuachung luhman (bi-khun) caah (ks. 345,000) le a leng thilzuar le sipin nih tlaihmi dawr paoh ah ngunkhuai hal ding (ks. 325,000) hna hi March 13 (ni hnih ni ) ah cawkzuarnak an thawk lai.
“Kum dang ahcun sathahnak License hi zuamcawhnak phun in an rak tuah. Biana ah vok thahnak license sing 50 in kan thap i a duhmi nih 60-100 tiang an i zuamcawh i a tambik kha pek an si. Atu cu phundang deuh in kan tuah lai. License man khizat khi rikhiah mi a si i anmah nih a thil tein rikhiahmi nak tlawm lo cabawm ah an ngamh zat an sanh lai. Cun Committee hna nih rikhiahmi kan ngei ve, cu cung i an lonh ahcun a tamcem paoh kha kan pek te hna lai” tiah sipin committee chungtel pakhat nih TCP ah a chim.
2017-2018 kumkhat chung sathahnak License a tu lio a tlaimi hna cu sa thahnak thenkhatnak Sasen ah Pu Ro Ceu le vok ah Pu Rung Hu an si. Sianginn sang sathahnak thenhnihnak Sasen le Vok he Pi Khual Dim an si. Sa man cu, Sasen cuaikhat 7000 le saruh 4000, sa chungril 4000 le voksa cuaikhat 7000 tiin ri khiahpiak an si. Sathahnak thenkhatnak hmun cu an sa cuai a tlinlo tuk caah sipin nih voihnihnak tlawmlo ralrin pek le tangka in dan an tat bal cang hna tiah theih a si. +++
About The Author
