Chin Ramkulh Tanghra Sianginn 78 Lakah Chin Galaxy Sianginn Result A Tha Bik

Tawk Tling Thang| 2019 June 11| 2019 kum Chin ramkulh pengkip tanghra sianginn 78 lakah zatuak in result a tha bikmi sianginn cu Chin Galaxy Private High School a si, zatuak 40% in a tha bik.

Chin Galaxy sianginn cu Hakha ah a ummi, private high school sianginn a si. Siangngakchia 50 an phi i 20 an awng, zatuak in 40% a si. 2018 kum ah siangngakchia 61 an phi i 14 an awng, zatuak in 22.95% an si. 2D le 1D in minung pakhat veve nih an ngah. Nikum nakin hnarcheu tluk result a kai tiah kan theih.

Result thabik chang hi Tonzang peng in BEHS- Darkhaing sianginn a si. Siangngakchia 13 an phi i 5 an awng, zatuak in 38.46% a si. A pathumnak cu Mindat pengkomh in Grace sianginn a si. Minung 83 an phi i 23 an awng, zatuak in 36.14% a si. A palinak cu Thantlang peng Hmawngtlang sianginn a si. Minung 3 an phi i 1 a awng, zatuak in 33.33% a si. A panganak cu Mindang pengkomh in Makuiinno sianginn a si. Minung 10 an phi i 3 an awng, zatuak in 30% a si. A paruknak cu Paletwa peng in Pahteintlang sianginn a si. Minung 10 an phi i 3 an awng, zatuak 30% a si.

A pasarihnak cu Falam peng in BEHS No.1 sianginn a si. 174 an phi i 47 an awng, zatuak in 27.01% an awng. A pariatnak cu Mindang pengkomh in Bengialah sianginn a si. Minung 130 an phi i 34 an awng, zatuak 26.15%  asi. A pakuanak cu Thantlang peng in Hriphi sianginn a si. Minung 4 an phi i 1 a awng, zatuak 25% a si. A pahranak cu Tedim peng in siangsangrunthen Tedim-4 sianginn a si. Minung 56 an phi i 14 an awng, zatuak in 25% a si. A pahleikhatnak cu Matupi peng in Salthaung sianginn a si. Minung 24 an phi i 6 an awng, zatuak 25% a si.

2019 kum Chin ramkulh pengkip ah tanghra sianginn zapi hi 92 a um i tanghra awnnak sianginn zapi cu 78 lawng a si. Hi chung ah result a chia bikmi sianginn cu Paletwa peng in Sami sianginn a si. Minung 198 an phi i 1 te lawng a awng, zatuak in 0.51% a si. A chiabik chang cu Paletwa peng thiam in Tantaung sianginn a si. Minung 68 an phi i 1 lawng a awng, zatuak in 1.47% a si. A chiabik pathumnak zong Paletwa peng in BEHS-No.2 sianginn a si. Minung 166 an phi i 3 lawng an awng, zatuak n 1.81% a si.

2018 Kum Chinram Tanghra Sianginn 28 In Pakhat Hmanh Tanghra An Awng Lo

2019 kum Myanmar ram pumpi tanghra camipuai a phimi zapi 851524 an si i 267696 an awng, zatuak in 31.44% an si. Myanma ram chung ah result a chiabikmi cu Chin ramkulh a si. Minung 10771 an phi i 2110 lawng an awng, zatuak in 19.59% a si. Chin ramkulh pengkip ah result chiabikmi cu Paletwa peng a si, zatuak 6.84% lawng an awng tiah Chin ramkulh fimcawnnak zung cazin ning in kan theih.

Leave a Commnet

%d bloggers like this: