China nih ralkap cernak le raltuk cawnnak a tuahmi hi ral tho ding in timhtuahnak a ngeih caah a si tiah Taiwan nih a chim
The Chinland Post | 2022 August 11 – China nih vawlei pi theih in bia ṭha aa chimter i raltuk cawnnak a ngei nain a taktak aa tinhmi cu Invasion War (ral thawh) a duh caah a si tiah Taiwan cozah nih a chim.
China nih Taiwan hi ka ram a si tiah a pom ko nain Democracy phung tein a kalmi Taiwan tikulh hmete nih cun adang tein dir kha a duh. August thla hramthok ah Speaker of US House of Representative Nancy Pelosi cu Taiwan ram ah a va tlawng i cu bantuk thiltuah nih China a thin a hunter ngaingai.
China nih Nancy Pelosi khualtlawnnak hi China ram zauk pung lennak a buarmi a si tiah a puh i Taiwan tikulh pawngkam ah thazang tampi in raltuk cawnnak ka ṭhawnter lai tiah a thanh. A taktak zongah Taiwan rili pawngkam ah China ti ralkap, van ralkap pawl nifatin in raltuk cawnnak an tuah.
Kuan taktak, bom taktak le hriam taktak pawl kahnak hna kha cawnnak chungah an telh. Atu bantuk cawnnak kan ngeihmi hi Nancy Pelosi ruangah a si tiah a chim ko nain a taktak ah China nih Invasion War (Ral thawh) a duh caah a si tiah Taiwan ramdang lei zung nih a chim.
Taiwan ramdang lei Minister Joseph Wu nih raltuk cawnnak chungah China nih phunglut a si lo nain theihthiamnak in riikhiah a simi ramri chungah atu le atu a rak lut tiah a chim. China nih Taiwan lak ding timhtuahnak pakhat bantukin raltuk cawnnak a ngeihmi hi a si tiah Press Conference ah Taiwan Minister Wu nih a chim.
Ramdang zong nih Taiwan ram a daih khawhnak hnga a chungpi tiang kan bawm uh tiah Minister Joseph Wu nih sawmnak a chim chih. China nih a ngantuk mi raltuk cawnnak pawl, hriamngan kahnak pawl le cyber lei tuknak hna a tuah i Taiwan mipi pawl lungzor ding in thawng dik lo thlahnak hna kau piin a tuah tiah Minister Wu nih a chim.
Ni chuahlei China raltuknak phu nih Taiwan rili kam ah submarine (ti chung a pil khomi tinbaw) kawlnak, rili chung kahdohnak pawl hna cawn a si rih lai tiah a thanh. Vawlei pi himnak lei thiamsang pawl nih a rauh hlan ah China nih Taiwan ram Defense (i khamhnak) a tha a der ding in pressure a pek peng rih lai tiah an ruahdamh.
About The Author
