Chinram Ah 5D In Distinction Tambik Hmutu Iang Khun Tial
Tawk Tling Thang|2019 June 8| 2019 kum Chinram ah tanghra a phimi vialte lakah 5D (Distinction) in distinction tambik hmutu cu Iang Khun Tial a si.
Iang Khun Tial hi tanghra a cawnnak cu Kalay ah a ummi YCW private sianginn ah a si. Asinain, Sagaing ramthen, Kalay cacheknak zung in camipuai phit a duh lo caah Chin ramkulh, Hakha- BEHS-No.1 sianginn in tanghra camipuai a phi. Tukum Chinram in a phimi lakah marksang (distinction) tambik hmutu a si. Amah zat Distinction a hmumi an um lo. Distinction a hmuhmi hna cu; English, Chemistry, Physics, Mathematics le Biology an si.
Amah hi Rev. Van Lal Uk (Farawn) le Pi Thlia Par (Zaangtlang) hna i an fale lakah a hniangbik chang a si. A pa hi 2016 kum in Khampat No.4- BCM church ah caantling in rian a tuan i tu hi church pastor a tuan lio cuahmah a si. Cu ruang ah atu hi an chungkhar in Khampat No.4 sang ah khua an sa.
Tukum Chinram in camipuai a phimi le a awngmi lakah Iang Khun Tial hi 5D in Distinction tambik hmutu a si, a chang tu cu 4D Par Bor Tha a si.
Tukum Chin ramkulh in tanghra a phimi dihlak hi 10771 an si i a awngmi 2110 an si, zatuak in 19.59% an si. Myanmar ramchung ah result chia bik a si. Tukum Chin ramkulh ah marksang (distinction) hmuhning zat cu; 5D-1, 4D-1, 3D-4, 2D-39 le 1D-208 an si. 2015 kum thawk in 2019 tiang kum 5 chung ah zatuak in tukum hi result that bik kum a si.
Tukum Chin ramkulh ah result thabikmi peng cu Falam peng an si, 1128 an phi i 332 an awng, zatuak in 29.43% an awng. A chiabikmi cu Paletwa peng a si, 1770 an phi i 121 lawng an awng, zatuak in 6.84% lawng an awng.
About The Author
