Sharon Dar Hnem Tial; Taang 9 Camipuai Dih Zarkhat Hnu In Taanghra Ca Ka Zoh Cang

0

Salai cung cung|2019 June 8| Taang 9 camipuai ka tuah dih zarkhat hnu in taanghra ca hi biatak tein ka zoh cang tiah tukum Chinram ah 3D in tanghra  awngmi Sharon Dar Hnem Tial nih The Chinland Post ah a chim.

“Pakhatnak ah tubantuk 3D tiang ka hmuh khawhmi hi Pathian thawng in a si. Cun ca a ka chimtu saya-sayamah zapi, a ka zohkhenhtu ka chungkhar le thlacam a ka bawmtu zapi cung ah lung lawmhnak tampi ka ngei. Tubantuk in Distinction ka hmuh cu kaa ruahmi ning cu a si lo nain, kaa ruah lo mi a sungh hmanh ka sung kho men ti ka ruah mi pawl tu ah Distinction ka hmuh caah kaa lawm tuk. Kei mah nih kaa tinhning ah cun 5D hi a si” tiah Sharon Dar Hnem Tial nih a chim.

“Hmailei taanghra a kai laimi le a phi ding sin ah chim ka duhmi cu, ca zuamnak lawng in a za lo ngandamnak lei hi tha tein i zohkhenh thiam a hau. A ruang cu kei hi kaa tinhmi ning in ka phak khawh lo hi ka ngandam deuh lo ruang ah  a si. Zeitluk ca ka zoh, kan i zuam ko zong ah dam lo ah cun duh ning in thil hi a kal kho lo. Cucaah ngandamnak zong tha tein i zohkhenh a herh tuk ve. Cun Pathian hi biatak tein i bochan a herh. Ca zoh lai paoh ah Pathian sin thlacam peng ding, kan Pathian nih tuah khawh lo mi a ngei lo. Taanghra kai lio ah cun Phone hi zoh lo ding bak si. A ruang cu ca zohnak ah hnahnawnak a pek tuk. Cun sianginn kai lio mi nih cun thilpuan lei zong lung pek tuk lo ding ka duh, a ruang cu ca lei an lung kal kho ti lai lo. Cucaah taanghra kai lio ah cun ngandamnak le ca zohnak lei lawng hi thinlung pe kho dih hna seh ti ka duh” tiah a chim chap.

Sharon Dar Par Hnem cu a khua Nabual a si i, Hakha khuasa an si. Pu Lai Peng le Pi  Fam Cin Thluai fale pali lakah a hniangbik a si. Sianginn kai hi taangcheu in taanghra tiang Hakha ah a kai i Sanpiah sawng in 3D he teinak a hmuh hi a si. Hmailei university kainak kong cu a mark zoh in a kai te lai. A zuam mi cu Cachimh hi a si tiah kan theih.

About The Author

Na ruahning rak langhter ve.. (Leave a comment)

%d bloggers like this: