Par Bor Tha; Dinh Caan Ah A Hlei Khun In Ca Ka Zoh Caah 4D Ka Hmuhnak Hi A Si
Salai CungCung|2019 June 8| Tanghra kai lio ah hin ka ngandamnak lei a that tuk lo caah zaan cazoh caanpek mi leng in cun ka zoh kho lo nain chun dinh caan pekmi ah a hlei khun in ca ka zoh caah tubantuk in 4D (Distinction) ka hmuhnak hi a si tiah Par Bor Tha nih a chim.
“Pakhatnak ah tubantuk in 4D ka hmuh hi Pathian min ka thangthat i Pathian cung ah kaa lawm. Tualleng (Mucu) ka kai in tanghra ka kai tiang fim a ka chimtu saya-sayamah zapi cung zong ah kaa lawm tuk. Cun ka ngakchiat te in tu ni caan tiang a ka zohkhentu ka chungkhar cung le taanghra kai tiang Pathian sin thlacam a ka bawmtu zapi cung ah kaa lawm tuk” tiah Par Bor Tha nih The Chinland Post ah a chim.
4D a hmuhnak kong he pehtlai in Nu Par Bor Tha nih, “Tu bantuk in 4D ka hmuhnak cu keimah thil ti khawhnak zeihmanh aa tel lo, Pathian thluachuah a si. Taanghra ka kai lio ah hin ka ngandamnak hi a that tuk lo caah zaan cazoh caan a dih in caanlak than in cazoh khi cu ka ti kho lo. Kei mah ca ka zoh dan cu, zarhpi ni le zarhte ni dinh caan pek mi chung ah hin biatak tein ca ka zoh. Cun zanlei tin caan ah khin inn ah tin colh lo in asawng ah suimilam 1 hrawng ca ka zoh ta peng. Zaan cu suimilam 10 tiang lawng ca ka zoh, hawibantuk in caan hlei lak in ca ka zoh kho lo” tiah a chim chap.
Par Bor Tha cu Biology in kumkhatnak ah 4D in teinak a hmu i tanghra a rak kai lio ah hin subject pa 6 lak ah Physics hi tlawmpal aa harh pah. Distinction a hmuh mi subject pawl cu, English, Mathematics, Chemistry le Biology an si. English major in Yangon university ah kai aa tim. Hmailei aa timhmi cu politician si hi a si, a si khawh cun President tiang si khawh aa tim tiah kan theih.
“Hmailei taanghra a kai dingmi nih tuah hna seh ti ka duh mi le zulh hna seh ti ka duh mi cu, Distinction hmuh khawhnak ding ah cun nikhat ca kan cawn mi kha ni khat ah zoh dih ding i zuam ding, nikhat ah zoh dih kho lo cun zarhte ni le zarhpi ni dinh caan pek mi ah hin zoh dih ding tiah kei cu ka kal pi mi a si. Cun taanghra kai lio ah cun thilpuan zong zoh tuk lo ding, thilpuan lei papek tuk lo ding, phone zong zoh tuk lo ding, ca lawng hi tha tein zoh i lungthing dih lak hi ca lawng ah chiah ding, saya-saymah nih ca chimhmi kha tha tein ngeih le tha tein zoh ding tibantuk hi kei mah ka tuah tawnmi a si caah chimh ka duh hna “ tiah Par Bor Tha nih a chim.
Par Bor Tha hi 2019 kum Chin ramkulh in tanghra awngmi lakah Distinction tambik chang hmutu a si. Distinction tambik hmutu cu Iang Khun Tial a si, 5D a hmuh. Par Bor Tha a chuahkehnak cu Hakha Khuahlun a si. Pu Ngun Kung le Pi Pen Tial fanu a si. Unau pali lakah a hniangbik a si. Amah hi tangcheu in tang 6 tiang Hakha Khuahlun ah a kai i tang 7 in tang 10 tiang hi Hakha BEHS-No.1 ah a kai. Tukum asawng a umnak cu Sanpiah Boarder a si tiah kan theih.
About The Author
