Chinram Hluttaw Nih U Phaw Aa Cu Milutchuak Le Minung Thazaang Hrampi Vuanci Ah An Fehter Cang

Tawk Tling Thang| 2019 July 1| July 1 ah tuahmi Chin ramkulh hluttaw caanhmaan tonpumhnak ah MP U Phwe Aa cu Milutchuak (Lah-wah-kah) le Minung Thazaang Hrampi vuanci ah an fehter cang tiah kan theih.

Hi kong he pehtlai in Thantlang peng ramkulh hluttaw palai Pu Van Thawng nih, “President nih cakuatmi Milutchuak le Minung Thazaang Hrampi vuanci cu chap ding in Chin ramkulh hluttaw nih June 27 ah kan fehter. Cu vuanci tuan ding ah Chief Minister nih June 28 hluttaw caanhman tonpumhnak ah min cazin a chuahpi. Cu a chuahpimi cu July 1 hluttaw caanhmaan tonpumhnak ah kan fehter. Ramkomh (President) sin ah hluttaw zulhphung ning in an kuat lai i President nih fehternak a tuah hnu ah hluttaw ah vuanci sinak biakamnak a tuah than te lai” tiah The Chinland Post ah a chim.

U Phwe Aa hi Kanpetlet peng ramkulh hluttaw in MP a tlingmi a si. Cozah term a tangmi kumkhat tluk chung vuanci rian a tuan lai.

Atu vuanci zung thar fehtermi he Chin ramkulh cozah ah vuanci 7 an um cang lai. Cu hna cu; Sipin Le Electric vuanci ah U Soe Htet, Social Affair Vuanci ah U Pau Lun Min Thang, Planning le Finance vuanci ah U Vui Kaw, Cinthlaknak- Zuatkhalhnak le Thingram vuanci ah Pu Mang Hen Dal, Lam le Sul vuanci ah Pu Sui Thio, Ramri Le Runvennak Vuanci ah Bogyi Han Win Aung le Milutchuak le Minung Thazaang Hrampi vuanci ah U Phwe Aa an si. Chin ramkulh Chief Minister cu Salai Lian Luai a si.

Chin ramkulh hluttaw palai zapi hi 24 an si. Hluttaw Speaker cu Pu Zo Bawi a si i deputy Speaker cu U Taih Thang a si.

Leave a Commnet

%d bloggers like this: