June 17, 2024

Ti A Har Ruang Ah Thantlang Khuachung Sangthen Cheukhat Le Sii-inn Mizaw Harnak An Tong

0

Salai Elvis| 2018 March 9| Thal caan a chuahfa te Thantlang khuachung sangthen cheukhat le sii-inn cu ti an har caah mizapi le mizaw pawl harnak an tong tiah thawng kan theih.

 

Tukum chungah Thantlang khuachung ti a harmi hna cu sianginn sang- sangthen an si i KBZ Bank nih ti phurhnak motor pahnih bawmhmi in ti voi hnih an ngalh/ phawtzamh cang hna tiah theih a si.

Hi kong he pehtlai in sianginn sang khuabawi nih, “Kan sang ti kan harnak bik a ruang cu ti a hmangtu minung, inn kan karh tuk cang caah kan i zat lonak hi a si. Kan sang zapi cun kan har fawn lo. Cu pin ah ti inn kan sak liopi a si caah ti duhning in mizapi kan pek khawh rih hna lo caah a si fawn. Cu ti inn cu sianginn sang lawng nih hman ding in Gallon 30,000 kau in kan sak liopi a si. Cu tikah KBZ nih bawmh mi motor in voi hnih ti an kan ngalh cang. Ti inn sakmi zong tu thla chungah aa lim colh lai” tiah Pu Van Tlir nih TCP ah a chim.

Sii-inn zong mizaw nih ti an i zat lo caah harnak an tong len. Hi kong he pehtlai in siibawi Dr. Van Van nih, “Sii –inn ti kan harnak hi a dang tein ti laknak (line) kan ngeih lo caah a si. Sipin zung lei zongah a dang tein tilaknak ding kan chim lio cu a si ko. A tu hi sipin lei nih voihnih ti a kan ngalh ve cang. Ti phurh man cu an kan la lo nain dizel (alhhang) man cu nan kan pek cang lai a kan ti. Ti kan harnak kong ah ramkulh zung lei zongah kan chim ko nain zeidik a lawh te hnga” tiah The Chinland Post ah a chim.

 

“Sii-inn kan um chungah nau ek suknak le dinti zong aum lo caah inn deuh ah thil kan su i dinti zong mahtein a lengah kan i cawk. Ek-inn ti kan hmanmi zong hi tikhonnak i ti a ummi khat a ne (a thiang lo mi) mi hman lo awk a that lo caah kan hman” tiah mizaw umpitu pakhat nih TCP ah a chim.

Atu bantuk in Thantlang sii-inn cu sianginn sang nih ti an pek chom ve hna caah ti an har veve nak hi a si.+++

About The Author

Na ruahning rak langhter ve.. (Leave a comment)