Chuah Nithla Cazin Hau Lo In Sianginn KG Kai Le I Ap Khawh A Si Cang Lai
TCP-Thantlang| 2018 May 19| Tukum 2018-2019 cacawn kum in ngaichia sianginn KG a kai ding paoh chuahni thla cazin (hmuai-sa-zin) catlap hau lo in nu le pa theihpinak lawng in sianginn nan apter khawh hna tiah fimcawnnak zung lei nih siangcachim hna sin ah theihternak thawng a thanh hna.
Tangcheu (KG), tangkhat (Grade-1) sianginn kai dingmi kum (5-6) ngakchia hna cu chuahni thla cazin le inn chungkhar cazin he sianginn ap ding ti asinain chuahni thla cazin a ngei lo mi hna cu nu le pa theihpi le hnatlakpinak in sianginn ap khawh a si.
“Micheu cu pakhat khat ruangah chuahni thla cazin ngeih lo le nu le pa hna nih lak awk a si ti zong a hngal lo mi an um. Cu tikah sianginn apnak caah chuahni thla cazin lo cun ngakchia sainginn ap khawh an si hoi lo. Cu caah chuahni thla cazin le inn chungkhar cazin lo in sianginn apnak nawl nan pek hna lai tiah rampi fimthiamnak vuanci zung nih an kan chimh tiah fimacawnnak zung riantuan Director pakhat nih a chim.
Ram pumpi huap in sianginn apnak caan cu May 25 in 31 tiang a si lai. Kum 5 a tling mi nih tangcheu an kai manh lo ruangah kum 6 a tlin cang ah cun tangkhat in kai thok khawh a si.
“Sianginn ap nak caah chuahni thla cazin le pungsan(10) an ngeih lo ruangah sianginn apnak nawl an ngei lo ti hlah u, a kum tling i sianginn kai aa thawh cang mi ngakchia cu cohlang hna u. Chuahni thla cazin a ngeih lo zongah cohlang hna u. Ngandamnak zung lei le fimthiamnak zung he i bawm in kanmah nih kan buaipi hna lai” tiah Yangon ramthen fimthiamnak zung Director Daw Khin Ma Swe nih May 16 ah a chim.
Sianginn ap hlan ah ngakchia chuahni thla cazin ahlankan in chuahpiak cia dingin ngandamnak lei zung nih theihternak thawng a thanh hna. 2018-2019 cacawn kum caah siangngakchia caah cacawn dingmi cauk, catialnak cauk, angki le hni zunkhat cio fimthiamnak zung nih alak in pek an si lai tiah theih a si.
Ref: 7Daydaily News
About The Author
