Daw Aung San Suu Kyi Inn Datsii Palang He A Cheptu Thong Kum 5 An Thlak

TCP-Online| 2018 July 3|  Yangon khuachung University Avenue i ummi rampi ruahnakpetu Daw Aung San Suu Kyi inn datsii palang he a cheptu pa Win Naing cu kum 5 thong thlak dingin July 3 ni ah biaceih zung nih bia a chah cang.

Sualnak a tuahtu Win Naing cu biaceih zung nih bia an hal tikah amah hrim zong nih ka sual ko ti aa pom ve caah tubantuk in kum 5 thong thlak ding biachah a ton zong a si.

Tukum February 2, zinglei sml. 6 tluk khan Win Naing nih hin Suu Kyi umnak inn No.54/56 cu datsii palang he a rak cheh. Hiti a rak cheh ah hin a chung um minung hliamhma pumi cu ahohmanh an um lo. Nain, inntual chung i Security umnak pawng ti pipe pakhat mei in a khangh tiah palek lei nih cun an chim.

Win Naing timi pa hi 2016 kum lio khan thluak lei damlonak rak ngei i sii-inn zong ah rak thlop bal cangmi a si.

Yangon ramthen Bahan peng hluttaw palai U Taung Htun nih cun, “Upadi lonh in a ummi paoh cu upadi ning in biachahpiak ding a si ko. Thluak lei tlamtlinlonak ngeimi a si zongah upadi ning in a bia an khiahpiakmi hi ka lung a tling ko” tiah a chim.

Win Naing nih Pi Suu Kyi inn datsii palang he a rak cheh tikah, Bahan peng palek U Hlah Htun nih upadi pohmah 436 in sual a rak phawt i biaceihmi a si.
Ref; Irrawaddy

Na ruahning rak langhter ve.. (Leave a comment)

%d bloggers like this: