Editor Sin Cakuat: Hakha Sii-inn Mizaw Conghtu Zulhphung Ka Uar Lo Ngainak
The Chinland Post| 2018 May 27|Hakha sii-innpi ah mizaw congtu zulhphung an tuahmi ka uar lo ngaimi cu zing 9:00am -11:00am kar mizaw congtu pakhat hmanh mizaw he um a ngah lo. Siibawi pawl round an tuah lio ti a si. Zanlei 2:00pm-4:00pm tiang cu thiamthiam.
India ah kum 8 deng ka um i kum 4 chung Medical Interpreter ka tuan i mizaw admit pawl zong Doctor pawl round an tuah lioah mizaw congtu pakhat cu um khawh a si. Pakhatnak tam nih umpi belte a ngah lo. Nain Hakha ah cun zinglei sml. 2 le zanlei 2 chung, nikhat ah sml. 4 chung mizaw kan kaltak hna tinak a si. Nain Siibawi nih an zoh tak hna caan cu minute 2 or 5 tluk lawng a si. Sml. 4 chung cu an zun chuah zongah, an tihal zongah, sii cawk herh zong ah, drip a rawh zongah le an thichuah caan ah, a holh kho lo le a holh huam lo zongah, an zual zongah zohkhenhtu ngeilo in an tuar a hau ko.
Sii din a herh caan ah rawlei asilole pakhat khat ei a duh caan ah thut a duh caan ah zun thawh a duh caan ah a luak a chuah caan ah, a thlan a chuah caan ah bawmtu an um hrimhrim a hau. A herh pingpang a um sual ah tiah mizaw congtu pakhat cu mizaw a pawngah a um peng awk a si tiah ka ruah.
Sml. 4 chung leng ah chuahtak a si tikah pakhat nu cu lam a kal kho lo i a tho kho lo i bawmtu a ngeihlo caah a zun aa ceh bal. Mizaw cu a tho kho lo, a dam lo caah amah tein cawlcanghter a that lo caah zei bantuk Siibawi an rat zongah an zawtnak konglam chimtu, sii cawtu le herhmi tlangtlatu pakhat tal cu a um awk hrim a si tiah ka ruah. Sii-inn rianttuantu hrim an hmurka a hrang tuk i mizaw caah theih a nuam lo ngai tawn.
Cucaah, hi Hakha sii-inn mizaw cawngtu hna zulhphung dingrep an tuahmi le riantuantu cheukhat nih hmurka awhrang in mizaw le a congtu raak a kan hmanmi an kan thinhpiak ding le thlenremhpiak ding ka duhnak ka hun langhter.
Upatnak he,
Catialtu;
Hakha khuapi chung, Dawrthar sang ah khua a sami upa pakhat
Biakilh: Hi cabia cu The Chinland Post careltu mizapi nih Editor sin ah an rak kuatmi cabia a si.
About The Author
