Editor Sin Cakuat: “Kan Miphun Kan Thawng Chin Lai”

Kawl Rallokap Ralhraang nih kan umnak, Kan Ram, Kan Khua, Kan Inn lila ah tlerhnak le thihphaihnak he kan lungput hrawh ding in a kan tuaitam, a kan tlerh. Hlaan lio ahcun Tlangcung miphun pawl sin i a kan tuahto daan hi ca le report ti bantuk lawng ah rak hmuh khoh le rak rel khoh deuh kan si. Cu hmanh ahcun cheukhat kan caah cun khoika dah ka va rel khawh lai timi hna a rak har ngai.

Kan Khrihfa sinak hmelchunh a simi kan Vailam Tung a kan phoipiak/hrawh piak i anmah biaknak a simi Pura a kan ser hnawh. Kan i al sek len zong ah meithal hmur he tlerh kan rak si tik ahcun kan rak ti kho hna lo. Atu kumzabu 21 ahcun mithmuh khoh bakin a takin a hun lang than. Thantlang kan tonmi cu Media le Networks phunphun, hman khoh mi Social Media kip ah, Video he Photo he ca pawl he a can cuahmah lio kan rak hmuh dih. Vawleicung ah a cul! A ho fa nih dah a celh lai, a bik in a ram fa hna caah cun a zual khun. Uknak/hruainak system thalo a dohmi le zaukphung a duhmi minung pohpoh nih kan sinnak kan tuarnak a kan hrawmpi cio dih.

Ralhraang nih mipi thimmi cozah nawlngeihnak a kan chuh bakin a lehrul kho mi cu Chin ram in hin a thok hmasa lei kan si ve. Min Ko Naing nih hitin a rak tial. “Kumzabu 21 ah Ti le Van le Vawlei lei he raldohnak thilri tling thup in a ngei mi ralkap hna cu tumi hmeithal, lai meithal in doh an si i tuanbia ah a roling ding a si lainak” a biazai in a rak tial. Kan hriam thilri ngeihmi cu a thlau tuk hringhran ko lai nain kan lungput belte cu sal lungput le miphun fa lungput bantuk kan si than ve.

Ka chim ning in tuah u, ka tuah mi bantukin tuah hlah uh timi, midang nan thih dih zong ah keimah ka him ahcun a zaa a timi lungput, CDM tuahmi ralbawi cheukhat nih an rak chim tonmi Kawl biaknak le Kawl miphun sinak lawngte an cawnter nak tehna pawl le hlaan chan 88 rampumpi a rak buainak hna a lingtalet in ralkap an cawn piaknak hna kong zoh tikah an fial khoh mi an kuttang pawl cu pawn men men khi an si ko.

Tuni Thantlang mei khanghnak kong zong ah an rallokap lei chimnak nawl a ngei mi Zaw Min Tun an timi pa nih “Thantlang khuachung ah PDF nih kutin serchom mi bom le meithal he mipi umnak inn i dor in a kan kah i kan dawi khoh lonak ding caah inn an khangh hramhram tiin” PDF hicu an a mah theihkhoh nak in an chim mi asi i Lai tlang ahcun CDF kha a ti duhnak asi. Mah a chimnak hi ralhraang media a simi MWD ah a chim mi asi. A lingtalet tuin mipi kha he tiah a kan puh, i huahnaseh a kan ti. Pakhat le pakhat I mawhchiat hnaseh timi khi an i tim ve. Cu zawn ahcun a kan tei khoh loding a biapi.

Khuachung a thawkmi inn khangh piak kan si tikah Kan Chin ram khuapi kip mithlam a cuang. Thantlang kan inn le kan biakinn hmun thiang hna meikhangh piak kan ton tikah he tiah an lung fak hnaseh timi le a kan nek nak khi hmuh khoh a si ko. Cun pakhat le pakhat sual phawt le i mawhchiat dih hna sehlaw kanmah hau loin anmah tein kekkuai dih hna seh timi an i timh bikmi zong a si chih. Inn le lo cu chikhat teah a rawk kho a cim kho, kan lungput belte a rawh sual ahcun kan ralpa aa lawmhnak le a hlawhtlinnak tu a si deuh lai. Na tein a tuar taktak tu le inn khanghpiak a tong mi hna chungkhar sin kan theihmi awka nih kan biakmi kan Pathian tu an hung thangthat, kan Pathian sunparnak tu an langhter. Cucu Thantlang khuami kan miphun hna nih ralhraang pa Min Aung Hlaing cu an tei cikcek nak asi.

Tuah hi ralhraang hna nih an rak tuah ton mi Four Cuts lawng si ti loin 1940 kum Japan nih Tuluk cung ah a rak tuahmi “Three All’s – Kill All, Burn All, Loot All” timi “Thah Dih Ding, Inn le Lo vialte Khangh Piak Dih Ding le An Ngeihmi Chawva Vialte Chuh Dih Ding” tiin a rak hman mi he a hung khat tiin ramkhel lei ngiathlat tu Anthony Davis nih Asia Times ah a hun langhter chih.

Tulio ralhraang nih akan tuah hnawh cuahmah mi ‘Operation Anawrahta’ ahhin a bik in Three All’s hi an hun hman ngaingai. Thah Dih ti tikah ralhraang uknak a duh lomi mipi cu an raal kan si dih – hriam he a dohmi kan mipi hna nunnak zong lak dih an duh bantukin mipi kan ruahnak kan lungput hrimhrim kha thah dih zong a kan duh mi asi. Milu a thawng, a sing in a simi hna Arab miphun hna zong nih miphun tlawmte barawh zat a simi Israel miphun han cu Mediterranean rilipi chung ah peih dih i an ram an inn lo vialte vutcam ah canter dih an duh peng ko. Lungput le zumhnak nih a thawnter chinchin hna!

Ralhraang nih kan chawva ngeihchiahmi a kan chuhmi hrimhrim hi a tam kho tuk cang. Nizaan nai ah Chin Miphun covo caah rian a tuan cuahmah mi CHRO zung umnak cu innpi a ngeitu NUG i Federal Union Affairs Minister Dr. Lian Hmung Sakhong inn zong ralhraang nih an chuh timi thawng kan theih. Thaizing ah zeidah kan cang lai timi kan thei rih lo, ralhraang nihcun lungput leiin hrawh a kan zuam.

Biadonghnak ah hi ralhraang hna nihin kan ruahnak kan lungput a kan hrawk kho ti lo. Inn le Lo a kan khangh piak kan Biakinn hmunthiang tiang telh chih in meikangh nak cu a turu kho tuk Hakha bakin Thantlang meikangh mi mei-alh hmuh khoh a si. Asinain, ka biakmi kan Bawipa Pathian nih kan nunnak kan humhim sehlaw, amah mintu sunparnak kan co ter.#

Na ruahning rak langhter ve.. (Leave a comment)

%d bloggers like this: