Editor Sin Cakuat: Mit In Hmuh, Hngalh Lawng Ah Thildik Hi A Si
The Chinland Post| 2018 August 13| Atu lio caan hi democracy zaukphung a si tiin phunghngalmi he hngalsetlomi he kan chim kan tial cio. A chim tialtu hi kan hnatheihnak ruahdamh zawnrin in kuttongh mithmuh umlo bak khuato vuinor ei in a ei vemi kan um len cang.
Kan bu kan party si ruang ah an palhnak thuhnawhpiak awk an si lo. An si lo ruang zong ah soisel thangchiat hmualphoh hlei awk zong an si fawn lo. A dik a hmaante in chimrel awk cio kan si dih ko. Mah bia he aa pehtlai in Hakha sii-inn mizaw le siibawi te kong ah cozah NLD hi sualphawt dih awk an si lo. Cozah riansang tlaitu paoh cu Kawl mi lawngte an si. Mah hna nihhin anmah tlaihmi cio a sining an hngalh dih ko caah cozah sin ah a herhnak bang hal le nawl awk tu an si deuh.
Hakha khualipi sii-inn um awk zat siibawi tling ko hna hmanhsehlaw a herh taktakmi khuaihlaitu an um lo ahcun kan harsat but e in Kalay, Mandalay, Yangon sii-inn kal theu a hau ko rih lai. Harsat but e in kal theu a herhnak cu a ruang a um caah a si. Mandalay sii-inn ka um lio ah ka mit in ka hmuh ka hngalhmi in ka tialmi hi a si.
1. Nikhat an hlaikhuaimi hna hi an tlawm hin lo. Minung pakhat hlai man an kan lakmi hi a fawi a har sining in ks. 30 in 40 tiang a si. Nifa te khuahlai an si. Thlakhat an hmuhmi zat hi Hakha cun kumkhat hmuhmi nih a zat ti lo. Sipuazi mit in aa thlau tuk cang. Chim duhmi cu Hakha ahcun an sung tuk. An lahkhah lawng ti awk khi an si.
2. An nupi le an fale nih an zulh an duh hna lo tikah mah lawng khuasak cu pa caah cun a har deuh fawn hoi.
3. Zoh hmuh awk a um lo. Lenkai duh zong ah anmah Kawlrawn bang taxi Bus hlan awk a um rih fawn lo.
4. Anmah Kawl duhmi eidin phun a tlinlo leng ah a man a har, a fak deuh fawn. Aa phua dih ti awk a si ko.
Cu a si caah a cunglei thil sining hi hngalh a hau. NLD lawng soisel thangchiat san a tlai lo ti lawng cu aho cozah an can zong ah kan cungcuang hlei lai tiah ka hmu lo. Siibawi sawhsawh hmanh nih Lairam um an duh lo cu hngalh cia mi a si ko. Siibawi te nih mizaw cung ah an zulh awk phung a um an hngal ko nain linglet in an sik, an raak, biahraang in an chawnh hna cu! Ka thial zawkzawk hna seh ti an duhnak an langhtermi tu a si. Mandalay sii-inn cu chim lo, Kalaymyo sii-inn he hmanh Hakah sii-inn cu an i thlau tuk rih.
Pu Khua Kung
Hakha Khuahlun
About The Author
