Global Zophei Paih Ah Zephai Nih Champion An Laak
The Chinland Post| 2019 May 13| Thantlang peng, Leitak ah tuahmi Global Zophei paih cu tlamtlingte in an dih i Zephai khua nih champion an laak tiah kan theih.
Hi paih zuamnak ah khua 14 in phu 14 an chuak kho. Khua 14 in semi final a kaimi khua cu Aibur, Khuabung, Congthia le Zephai-A an si. US in arak tlungmi Khuabung khuami Tial Awi Thang cu semi final ah Zephai khuami Mang Thawng Lian nih a tei. Cucaah, Final ah Zephai le Aibur an kai.
Van Ram Awr a singkhaw i khel khat a tei khotu Mang Thawng Lian nih semi final ah US tlung Tial Awi Thang, final ah Aibur pathawng bik Sui Bik Lian (Pahniang) a tei hna hnu ah champion an co hi a si.
Champion cu sing 10 le trophy pek a si. Laksawng caah US in NAPC paih committee nih $500 an hlut ve caah champion laksawng sing 10 kan tuah khawh hi a si(CPC nih sing 5 pek ding kan ti hmasa). NAPC cung ah kan i lawm tuk tiah Salai Lungthli Tum nih a facebook ah a langhter.
2nak a ngahtu Aibur cu laksawng sing 2, a dang champion a co kho lomi khua vialte zong club pakhat lim ah 15,000 pek a si tiah kan theih.
Thantlang peng um Zophei tlang khua (23), Hakha-Thantlang um Zophei mizapi le ramleng um a bik in Zophei Family Network Of America (ZFA) hruainak le Zophei Youth Organization tawlrelpinak in Zophei ifuntomnak le thanchonak caah theihthiamnak cu kan thazaang timi tlangtar in Global Zophei Seminar May 9-12, 2019 tiang Modern Leitak ah an tuah.
Hi Seminar chungah Zophei Idol zuamnak, Zophei Miss zuamnak, Nu/Pa volleyball zuamnak, Hlaremh zuamnak le Paih zuamnak zong an tuah tiah theih a si.
Photo: Salai Lungthli Tum
About The Author
