Hakha Ah Belhar Khuami Ceu Lian Motor Nih A Rial I A Thi Colh
City Hunter| 2018 April 5| April 5, suimilam 11:30 tluk, Hakha, Dawrthar sang, sii-inn lampial- bogyoke lampi cung i lam rian a tuan liomi- lamtuahnak Sakai (Tuluk) motor nih Ceu Lian cu a rial i hmakhatte ah a thi colh.
Dawrthar sang, bogyoke lampi hi kat-ta-za an phah cuahmah lio a si. Cho kai lei in orhleikam lam hi kat-ta-za an phah liopi a si caah minung kal lo ding in hri an zam. Cu hri an zammi chung lam hnarcheu orhleikam cu lam riantuantu nih kat-ta-za an phah cuahmah. Cu hri zaammi chung cun Ceu Lian cu a va lut i lam rian a tuan cuahmah liomi lamtuahnak Skat motor nih a pah/rial i hmakhatte ah a thi colh. Sakai motor nih a rial caah a ka/ a kha vialte a bauh dih. Lam tuahnak Skat motor hi cuka hmun cu rian a tuan cuahmah lio a si, hnu a sauh pah lio ah atu bantuk in a pah hi a si tiah motor PK le a pah lio a hmutu upa hna sin in The Chinland Post nih kan theih.
“Ceu Lian hi a mitkhua a hmuset lomi, a mit a mawmi le mi pumtlinglo tlangval a si. Ceu Lian hi Hakha Dawrthar sang, Dinlo sangthen ah a ummi a si. Amah hi Thantlang peng, Belhar khuami a si. Amah hi kum 40 hrawng a si. A nu le a pa hi Pu Leng Sai (tleicia) le Pi Sal Thlia fapa a si. A mit a that lo ruang ah atu bantuk in thil poipang a ton sual a si. Atu hi sii-inn ah operation an tuah liopi asi. A rauh hlan ah an chuahpi lai i an umnak Dinlo sang ah a ruak an suan ko lai” tiah Dawrthar khuabawi nih The Chinland Post ah a chim.
Sakai motor hnu a sauh lio ah hin cuka hri zammi chung cun a kal chih ruang ah atu bantuk thil a ton hi si. Sakai motor mongtu zong nih cun a hngal colh ve lo i a hmutu hna nih fakpi in an auh hnawh hnu lawng ah a hngalh ve. Ceu Lian ruak tu cu sii-inn ah an kalpi colh ve.
March thla chung ahkhan Hakha Dawrthar sang ah motor le cycle i khawndennak voithum a um i minung pahnih an thi tiah theih a si.
About The Author
