Hakha Ekah 676 Innhmun Man December 31, 2020 Ni Tiang Tling Tein A Pe Lomi Chuh Than An Si Lai
676 Ekah Hakha Sangthar samhmi Hmun a si/ TCP
Salai Josephbawi| TCP-Hakha| 2020 November 28| Hakha Ekah 676 Hmunhma ah innhmun a sok i a ngah nain December 31, 2020 tiang a hmun man a pe kho lomi cu Innhmun chuh than a si lai tiah Chin ramkulh Cozah lei nih thawng an thanh.
“Hakha ekah 676 hmunhma pek mi hna mi tlawm cheukhat cu innhmun a chiatuk tiin a la than lomi an um. Innhmun a la ko nain 8% hrawng inndong inn (500) leng ah dong 60 leng nih innhmun man an pe kho dih rih lo. A dang cu an pek dih cang. Cu a pe dih rih lomi nih December 31, 2020 tiang innhmun man an pek lo ahcun Innhmun pek lio ah zulhphung kan tuah ning le an theih bantuk in aman an pek khawh lo ahcun inn hmun chuh than an si lai, khirh a um ti lai lo” tiah Hakha ekah 676 innhmun peknak committee chairman Vuanci Sui Thio nih The Chinland Post ah a chim.
“Kan ruahning ahcun January 1-15, 2021 tiang a tang rih mi innhmun thar 318 fai pek rih kan itim. Innhmun zat fehternak a um rih lo caah a tam deuh kho men. Cu zong cu Committee hnatlakningin rikhiah a si lai caah aho dah a sok kho timi thawng kan in thanh than te hna lai” tiah The Chinland Post ah a chim.
Hakha Ekah 100 tuahmi zongah inndong 16 fai cu nihin nin tiang innhmun man an pek lo caah le inn sak an timh rihlo caah Hakha Sipin nih a herhningin tawlrel a si lai tiah theih a si.
Hakha Ekah 676 hmunhma cu Hakha pupa ram ngei, Dum ngei ka si tiah aa timi hna nih inn umnak le thlam inn an sakmi inn (130) leng cu Chin Ramkulh Cozah nih phungninglo a si tiah an ti caah a zapi in August 20, 2019 ah rak hrawhpiak dih a si. Cu hmunhma ah ningcang lo in hmun a zuartu tiah ruahmi minung (6) zong Chin ramkulh Cozah nih Hakha ah thla (8) chung thong an thlak hna. Phungning tein inn hmun, dum ka tuah liomi asilo ah dum license a ngei mi tiah aa timi cheukhat nih ka hmun/dum an ka chuh tiin Vawlei chuhmi tawlreltu committee, Naypidaw ah ca a tialmi lawng nihin ah ningcang tein an tawlrel piak cuahmah hna tiah theih a si.
Hakha Ekah 676 camcawhfung zuh in inn hmun peknak cu July 1 , 2020 ah Hakha Town Hall in an rak tuah nain Hakha ah kum (20) a um cang mi inntek khuami le Cozah riantuantu an pu theihpinak in Hakha ah kum (10) a um cangmi timi lawng pek siseh an ti caah soiselnak tampi a rak tong. July 9, 2020 zing 8:00AM ah innhmun a ngahmi hna innhmun hma pekmi zohpinak le fehternak zong Committee hruainak in an tuah tiah theih a si.
Hakha Ekah 676 ah innhmun dihlak 799 a um I pe 100×100 athami cu sing (150), alai sing (90), achiami sing 50, pe 80×80 athami sing (96), alai sing (60), Pe 80×60 athami sing (72), alai sing (45), achiami sing (20), pe 60×40 athami sing (36), alai sing (20) le achiami sing (10) in zuarh a si.
About The Author
