Hakha Innhmun Thar A Ngahmi Hmaizarh Chungah Pungsan 105/106 Lak Khawh A Si Cang Lai
Salai Ngun San Aung| 2018 May 11| Hakha sangthar samhmi ekah 100 chungah innhmun a ngahmi paoh hmaizarh chungah pungsan 105/106 lak khawh a si cang lai tiah vawlei tahnak zung lei in kan theih.
“Nai te ah vawlei peknak nawl an chuah piak cang mi hna paoah kha an catlap kha an tlen (copy) lai i kan zung ah an rak ap lai. Tu hi punsang 105/106 a dih caah kan cah lio i hmaizarh chung cu a phan lai. Zeitik in ti bel a fiang rih lo. A phak tikah a rak hmasabik paoh kha pek an si lai i nikhat ah inn kua hra leng cu kan pe kho hna lai ka zum lo. Pungsan 105/106 lak tikah tangka siseh a dang zeihmanh ken a herhmi a um ti lai lo” tiah vawlei tahnak zung riantuanmi upa pakhat nih The Chinland Post ah a chim.
Hi pungsan 105/106 lak khawh sin in Sipin sinah innsaknak nawl (Soh mingh) hal colh khawh a si lai i inn sak domh colh khawh a si lai. Inn hi thla ruk chung ah sak ding tiah tuanvo ngeitu nih zapi sinah thawngthanhnak an tuah cang.
Innhmun an tah i hri zong an zam cia mi kha lam an kauhchap nak ah a rawh pah dih ngawt caah a thar in tah a hau lai i innhmun pakhat ah 30,000 MMK liam a hau lai tiah mizapi sinin bia kan theih. Hi kongah vawlei tahnak zung in tuanvo ngeitu nih atanglei bantuk in an fianter.
“Innhmun cu kan tah dih i map (meetung) zong kan suai dih cang caah tah chap a hau ti lo. Amah bel lam kauhchapnak leivawr nih cinchiah nak tung kan khenhmi le hri kan zam mi pawl a chilh pah dih ngawt caah mizapi nih an inn hmun kha an i hngal kho lo. Cun inn hmun pek cia mi chungah ram ngei ka si a timi pawl nih kanmah ta tiin hau an i kulh mi a um len caah pakhat hnih lawngin kal in tlangtlak awk a tha lo. Cucaah hi sangthar samhnak ah tuanvo ngeitu upa zeimawzat kal in anmah innhmun ngeitu kha hika zawn pe cu zat cu na hmun si tiah hmuhsak nak kan tuah lai. Vawlei tahchap a hauh ti lai lo caah hmun ngeitu nih tangka fangkhat hmanh an liam hau ti lai lo. Amah bel minung pakhat hnih lawng in va kal pi awk an that lo caah inn kul sawmthum tibantuk in vawlei ah kal pi le hmuhsak a hau lai.”
Thla ruk chung ah inn sak ding ti a si caah hmun ngantu lei kap in cun tuan ah an hmunhma zohpi le chimh cu an duh. Cucaah a rangbik in tuanvo ngeitu nih an tawlrel ko lai tiah kan theih.
About The Author
