June 22, 2024

Hakha Khuachung Lam Min Bunhmi Rian Aa Lim Rih Lo

0

Editorial-The Chinland Post

Chin ramkulh khuahlipi Hakha cu Sipin tlangtlaknak in Hakha City Master Planning Committee nih kum nga tluk chung voi tam lak te ton le ruahnak chuah lengmang cio hnu ah 2018 February ah min cu lam ah khenh dih a hung si.
Min an sak ning hi phun nga in then a si i a dihlak ah min 84 a si. Cu chung ah peng kip in mah le peng chung bochan mi nu le pa min cio an chuahpi i Kanpetlet-4, Tedim-5, Tonzang-3, Thantlang-4, Paletwa-5, Falam-7, Matupi-1, Mindat-4, Hakha-19, Rezua-1, Sami-3 an si i pengtlang kip chuahpi mi kan nu le pa 56 min an si. Cu hnu ah a lenglei min ah 13 an um than. Cu hna cu Bogyoke Aung San, Su Kyi, Thein Sein, U Thant ti mi Kawl min pawl le kan Siangbawi te chung in Strait, Cope le Newland an i tel. Cun khuapi min ah Thantlang lam timi pakhat te aa tel. A donghnak lei ah a ummi cu Fingtlang min, pangpar min le mah le sang cio in caan saupi rak auh cang mi min tahchunhnak ah Agape tibantuk zong aa tel. Cun Siangbawi lam zong a um. A dihlak ah 84 lawng a si nain lam min khenhnak tung hi 172 kan bunh tiah HCMP chairman Pu Thla Hre nih a chim.

 

Hi bantuk in kan lam pawl Lai min tein bunh ding timi hi 2013 lio, USDP Cozah chan tein rak ceih lengmang cang mi a si. Hihi Ramkomh Myanmar Cozah nih upadi ning in mah le khuapi chung lam min mah duh ning tein saknak nawl Sipin sinah a pek mi a si. Hi vialte an kan tuahpiak cang mi leng ah pehzulh in tuah lo awk a tha rua lo tiah ruah mi zong an um.

Lamhmuh Saknak Cauk le Min cuang hna an tuanbia langhternak cauk an chuah a herh

Kan lam cungah kan nu le pa, kan Lai pangpar le fingtlang min kan i bunh mi cu kan auh tung hna lo le Cozah zung zong nih an kan pompi tung lo ahcun sullam ngei lo a si. Cucaah mizapi thinlung ah a nun i kan hmurka in a chuahnak ding le cozah zong nih an kan hngalhpi i hmanpiak ve hrimhrim a herh. Cubantuk a si khawhnak ding ah cun a luancia kum thum li lio te in rak chim peng mi Directory cauk (lamhmuhsahtu cauk) an chuah khawh a herh. Hi bantuk cu Cozah tangka hmang lo tein tuah khawh tuk a si. Lam a um ko. Lam min zong kan ngeih cang caah Hakha map (Meepung) kan ngeih a herh. Cucu Sipin, GAD pawl an rian a si. Cu map cu hmunkip ah kan tarpiak hna seh. Media vialte sinah kan pe dih seh, zung kan i chiah cio lai i thawngpang kan tial tikah cu ning te cun kan hman lai. Khrihfabu kip zongah biatak tein chimrel le luhpi a herh. Sang le lam an then ning kha min sak thar mi ning in an kan thlenpiak a herh hringhran ko. Anmah hi an biapi tuk. Sipin nih a pekmi min ning tein Cozah zung pawl nih address an tial tikah an zulh a herh. Cun mizapi in thitum sawmnak, thlacam sawmnak tibantuk pawl ah hi ning tein kan zulh a biapi ve lai fawh hih.

 

Cun kan lam ah kan hmanmi min pawl hi pakhat cio an tuanbia tawi fiannak in tialpiak hrimhrim a herh. Cu lo ah cun khi lam min an kan sakpiakmi khi tung a pur sinah min zong a tlau ve lai. Lam cungah a min a dir a biapit tluk tein mizapi thinlung ah hodah a si i kan ram le miphun caah mizei dah a si timi a nun kha a biapi mi a si. Mino hna nih kan miphun chungah zohchun tlak nusal pasal tha kan rak ngeihmi hna kan hngalh than le miphun sinak ah lunghmuinak ngei in miphun dawtnak thinlung thawng kan ngeih nak ding hi bantuk tete hi a hmesem mi an lo nain a biapi taktak mi an si.

Cucaah Sipin nih hi tiang an kan tawlrelpiak cang mi hi man a ngeih ding tluk a ngeihlo sual nakhnga lo retheih hun i khinh deuh in Directory le tuanbia cauk chuah cu kan zuampiak rih ko uh tiah ka bia ka donghter. (Editor)

About The Author

Na ruahning rak langhter ve.. (Leave a comment)