Khonumtung Tupi Hual Cu Vawleicung Tupi Hual Ro Dum Ah An Ser Lai

The Chinland Post| 2018 March 7| Chin ramkulh ah tlang sang bik le Kawlram chung ah tlang sang bik chang a simi Victoria tlang um, Khonumtung Tupi Hual (Victoria tlang) cu “Vawleicung Tupi Hual Ro Dum” ah Myanmar ramkomh le Chin ramkulh cozah nih an ser lai. Victoria tlang kong asilaoh Khonumtung Tupi Hual Dum kong na hngal ve cang maw? Na kal bal ve cang maw? Zeiruang ah dah Vawleicung Tupi Hual Ro Dum ah ser an timh, zoh ti hna usih.

Khonumtung tupi hual (Victoria tlang)

Khonumtung Tupi Hual Umnak Hmun
Khonumtung Tupi Hual (Mount Victoria National Park) cu Chin ramkulh thlanglei Mindat, Kanpetlet le Matupi peng chung ah a um. Khonumtung tupi hual chung ah Mount Victoria tlang a um. Victoria tlang hi Chin ramkulh ah tlang sang bik a si. Cun Kawlram chung zong ah tlang sang bik chang a si. Kawlram chung ah tlangsang bik cu Khakaborazi tlang a si.

Khonumtung Tupi Hual Dum A Bitkauh
Khoumtung Tupi Hual Dum chung ah Victoria tlang a um. Victoria tlang cu vawlei khuhmi (ေျမသား ဖံုးလႊမ္းမႈ အမ်ိဳးအစား) phun ah ASEAN chung ah a sang bikmi a si i Kawlram ah a sang bik pahnihnak tlang a si. Rili in pe 10,500 a sang. Rampi cozah nih National Park (Ecotourism) tiah 2010 December 2 ah a fehter. Khonumtung Tupi Hual Dum cu ekah 176,300 a kau i Kanpetlet, Mindat le Matupi pengthum fonh in ser a si. Kanpetlet peng ah ekah 29,530, Mindat peng ah ekah 13,3970 le Matupi peng ah ekah 12,800 a um (Bawipatu Tupi Hual khi ekah 30,720 a kau).

Vawleicung Tupi Hual Ro Dum Ah…
Khonumtung Tupi Hual (Mount Victoria National Park) Dum cu vanrangtoi ah a har taktakmi White-Browed Nuthatch va le miphun hmelchunh va sunglawi zong an um caah ramkip va phun a hlathlaitu caah a tha khun. Hi bantuk in tupi chung ah thingkung, saram, pangpar, sii-ai caah a thami ram hnah phuntling tampi an um caah 2012 September 20 ah Khonumtung Tupi Hual Dum cu ASEAN Heritage Park tiah cozah nih an fehter. Hi bantuk in a hrampi a thami Khonumtung Tupi Hual Ro Dum cu Vawleicung Tupi Hual Ro Dum (World Heritage Park) pakhat si kho ding in ramkomh le ramkulh cozah nih an i zuam liopi a si.

Matupi in khan 12 aa hlatnak Thisawng khua pawng ah Bungtla Tisor zong a um rih. Hi tisor hi kokek hrampi bunh in khualtlawng mi caah kokek pekmi laksawng pakhat a si. Hi tisor cu ecotourism ca lawng si lo in ecosystem caah a biapi ngaimi a si.

Khonumtung Tupi Hual Dum Ah A Ummi Thilnung
Tupi a umning phun hi tlangcung hringdildel tupi, tlangcung farthing tupi le tlangcung hramhbelh tupi tiah phunthum a um. Hi bantuk aa khat lomi fonhmi tupi a sinak nih kokek a hrampi khualtlawnnak (Ecotourism) caah duh a nunnak, mit a hlannak le a that khunnak pakhat a si. Thingkung hi phun 2,500 ringlo a um. Cun kokek in a chuakmi Chokhlei Par zong arang, asen le aihre (eng) tiah phunthum a um. Ramkip dirhmun tluk in a sangmi sii-ai ser ding phun 100 ringlo a um. Thingkep par hi phun 200 ringlo a um. Hnukding saram phun 43, va phun 345, a lawn in a lawnmi saram 105, palep phun 77, a cuar a hakmi rungrul phun 35, sawmpalak phun 94 an um.

Khonumtung Tupi Hual Dum Luhman Laknak
Ramdang khual a phanmi lakah England hi 14.76% in a tam bik i a changtu ah France 8.28% in a si. Hotel & Travel Development, Mindat Zungthen cu 2010 kum, Mindat ah hun a si. 2014 October 1 thawk in Khonumtung Tupi Hual Ro Dum luhman (minung pakhat) ah US $ 10 (Ks. 10,000) an lak cang hna.

Natmah Taung Maw Khonumthung Dah?
Khonumtung tlang cu a hlan ah Natmah Taung tiah auh a si tawn nain Chin ramkulh hluttaw nih kokek min in auh siseh tiah bia an chah caah Khonumtung asiloah Khonumsung tiah auh ding in an fehter cang.

Khonumtung Tupi Hual Dum asiloah Victoria tlang pawngkam ah siaremte in khualriahbuk inn (hotel le guest house) zong tampi an sak cang. Kum fatin te ramdang mi khual a phanmi hi 2013 hnu cun 1000 renglo lengmang an si tiah Chin ramkulh hotel le khualtlawnnak lei tuanvo ngeitu zung cazin in kan theih.
Ch: TCP: Vol.2, No.70 le Chin Digest
Catialtu: Salai Holy Tawk Tling Thang

Na ruahning rak langhter ve.. (Leave a comment)

%d bloggers like this: