Hakha Khuapi Sersiamnak Planning Cu Sipin Nih Tlaih Ti Lo Ding In Tawlrel An Timh

0

Salai Ngun San Aung| 2018 March 8| Hakha khuapi sersiamnak, sangthar samhnak ca inn hmun phawtzamh ning, lam cawh ning ti bantuk pawl timhlamhnak rian (Town Planning) cu Sipin nih tlaih ti loin Uu-Eing nih tlaih si cang seh tiin a nai bik Cabinet meeting ceih ding in chuahpi an timh tiah kan theih.

Hi kong ah min langhter a duh lomi tuanvo ngei upa pakhat nih, “khuapi sersiamnak (town planning) hi sipin nih a tlaih awk a si lo. A tak tak ah cun Uu-Eing nih a tlaih awk a si. Cu tu hi kan khuapi sersiamnak rian kan zoh tikah rian kal a duhsah tuk. Hitihin cun zei ngai kan chuah pi kho lai lo. Cucaah Town Planning cu ramkulh le ramthen dang cio bantuk le Minister zung rian an then ning tein Uu-Eing nih tlai hna sehlaw rianhma a kal deuh lai ti kan ruat. Uu-Eing cu Lamsul lei Minister zung nih an tlaih mi a si caah Minister Pu Sui Thio tlaihmi tang ah a si hnga ti nak si cu” tiah a chim.

Hluttaw Speaker Pu Zo Bawi nih, “Hakha cu ramkulh khuahlipi a si. Khuahlipi ah minung sing khat tal kan um lo ahcun kan thancho ning a nuar tuk lai. Cucaah peng dang dang zong in siseh, Hakha peng chung khuate in le Malaysia, India tibantuk zong nih Hakha ah um a duh mi paoh nih inn hmun an hmuh khawhnak ding kan tawlrel khawh a herh. Cuti rian rang deuh in inn hmun tam pi samh ding ah cun tu i sipin nih an kal pi ning hi cu a nuar tuk. Cucaah Town planning hi Uu-Eing nih tlai sehlaw rian hma a kal deuh lai tiah kan ruah” tiah a chim.

Chin ramkulh cozah phu rian tuan ning ah hluttaw lei kap in an lungkhan tluk an si deuh lo nak le rian hma an kal pi ning ah an hlam deuh hna nak ah Hluttaw Speaker changtu MP U Aung Than zong nih media le zatlang bu he tonnak ah tam lak te a rak chim cang.+++

About The Author

Na ruahning rak langhter ve.. (Leave a comment)

%d bloggers like this: