Hakha Khuathar Pupa Thlan Cozah Nih Hrawhmi Cungah Inntek An Ngei A Chia

Hakha Khuathar Pupa Thlan hlaimi/TCP

Salai Josephbawi+Salai Cung Cung| 2020 March 2| Hakha khuathar pupa hna vuinak hmunhma Pu Ral Hmung Certual thlang ummi cu Hakha pengkomh fimcawnnak zung saknak caah tiin March 1, 2020 zanah JBC in hmunhma an chunh i thlan hmunhma tampi vawlei vor nih a chilh ruang le anmah nawl in thlan an hlaimi cungah inntek khuathar khuami an ngei a chia tiah thawng kan theih.

“Hakha khuathar kan pi le kan pu an i vuinak hmun a si. Mino le chungkhar lei nih kumkhat voikhat tibantuk in an thlawh piak ton hna mi a si. Mah hi an hmuh ko nain Cozah maw an si ho nih maw tubantuk in thil an vun tuah tik ahhin kan ngeih chia ngai. Hi thil hi a thilthup in kan khuabawi zong theih ter nak um lo, sianginn sayakyi zong theih ter mi um lo, an mah nawl in zaantim ah an tuah mi hi mifir le mi tha lo rian tuan a si ti ka hmuh ning le a thi mi chungkhar lei hmuh ning a si. Hi thil an tuah mi hi khuathar ngakchia in upa lungfim cang mi poh cu kan lungfak i kan ngeih chia. Thih hlan lo phlih awk tha mi thil si lo. Zei thawng pang hmanh a kan thanh lo, tonbiaruahnak zong um lo, thlan kan hlai ti zong chimh le thawng thanh pakhat hmanh um lo. Hmai lei ah Cozah lei zong nih a tang rih mi thlan hi hman an duh a si ah cun a hlankan tein thawng thanhnak le theih ternak kan tuah hna seh, cun mipi he tha tein tonnak ngeih hnu,mipi hnatlaknak ngeih hnu ah rian hi kan tuanpiak hna seh law ti kan duh” tiah Khuathar Lothlobu Chairman Pu Biak Peng nih The Chinland Post ah a chim.

Hakha Khuathar Pupa Thlan hlainak/TCP

“Thlan hlai hi ni zaan zarhpi ni lawng ah khan thaizing Marh 1, 2020 hi thlan hlai a si lai an ti. Upa pawl nih an chuah pi ning ahcun thlan 17 an ti nain tu hi kan theih ning ah thlan 20 tiin kan theih. Laimi cu thlan lung cio ah min tete lung in rak phum a si, mah cucu an theih lo kar ah an rak phoih i an rak thial dih hna i mah cu an ngeih chia biknak a si. Thlan hi ruah domh in an kawl tik ah an ruh le an ruak zong hi azapi in a hmuh dih lomi hna an um. Thawng thanhnak zei hmamh um lo in mi nih an chim ning ah ni zaan suimilam 11:00 hrawng in an thawk an ti. Tu ni lawng Khuathar mizapi nih cun kan theih hna. Kan nu kan pa le kan mino hna zong nih an chim cio te lai hmailei ah cun an ngaih a chia tuk cio hna’ tiah Khuathar sang um Pi Thla Iang nih The Chinland Post ah a chim.

“Thlan kan thialnak hmun hi Cozah nih pek mi si lem loin kan mah khuathar nih thlan hlai mi phumnak te kan ngei i ma ka ah cun thlan hlai mi poh i phum a si. Cozah cu kan hruaitu le kan pa le an si bantuk in khua le ram caah timh tuahnak an ngei mi hi tha tein mipi tonnak hnatlak ngeih hnu in rian hi tuan hna seh law kan mah zong hi thlan hi thial lo ding kan ti nak si lo, tha tein tonnak le ceihkhan um lo in an tuah mi hi cu kan duh lo. A tu tang mi thlan hi Cozah lei nih ram thanchonak caah hman an duh a si ah cun tha tein ca he tonnak ngeih hnu in kan khuathar mino le upa ceihkhan hnu ah hnatlak ning kan kal pi lai.” tiah Khuathar mino Vice Chairman Salai Van Lal Cross Thang nih The Chinland Post ah a chim

Hi kong he pehtlai in Chin Ramkulh Chimrelnak nawlngei Sipin Vuanci  U Soe Htet nih “ No.2 BEHS sianginn area chung ta ekah 2 hi pengkomh (district) fimcawnnak zunginn caah pekmi an si. Anmah pengkomh fimcawnnak zungin tuanvo pekmi nih an tuanmi a si i a tu bantuk mithi hna chungkhar theihterlo in an tuah lai cu ka zum lo. An tuah sual ahcun kaphnih karlak tha tein chonbiaknak kan tuah than lai. Fiang deuh in kan chim kho dih rih lai lo” tiah The Chinland Post ah a chim.

Hakha khuathar pupa hna vuinak thlan thing cu Hakha No.2 BEHS sianginn pawng Ral Hmung Certual thlang ah a ummi a si i tulio Shopping Mall saknak ding ah a dirnak hmunhma lei kap a si tiah theih a si.

Na ruahning rak langhter ve.. (Leave a comment)

%d bloggers like this: