Hakha le Thantlang karlak Degree College kahdohnak ah CNA 3 an nunnak a liam, SAC ralkap 15 hrawng an thi
The Chinland Post | 2022 October 14 – Chin ramkulh, Hakha le Thantlang karlak, Education Degree College pawng ah SAC ralkap le CNA, CDF phufonh hna karlak ah kahdohnak a chuak i miphun ralkap a simi CNA in 3 nih ram le miphun caah an nunnak an pek i CDF hriamtlai 4 hrawng hliam an tuar tiah theih a si.
Oct 13 zinglei sml 10 hrawng ah CDF, CNA phufonh hna cu Thantlang – Hakha lam in an rat kha SAC ralkap pawl nih an theih caah timh cia tein an hngah hna i an kah hmasa hna caah atu bantuk in CNA ralkap 3 an nunnak a liam i CDF hriamtlai cheukhat an i hliamnak hi a si tiah Fifty Two News nih a langhter.
Cu kahdohnak chungah SAC ralkap lei in 15 hrawng an thi tiah laihlum thawngzamh pawl nih an langh ter, SAC leiṭang thawngzamh a simi Fifty Two News nih cun kahdohnak chungah CNA ralkap 3 an thi i hriam cheukhat zong SAC ralkap nih an lak khawh tiah a langhter.
October 14 zinglei sml 7:30pm hrawng in Hakha hrambunh LIB 226 nih hriamngan pehzulh in an kah i Hakha sizung pi lei zong in meithal thawng chikhat kan theih tiah khuami hna nih an chim.
