Malaysia kal ding in ramri a rak lonhmi Myanmar 15 an tlaih hna

The Chinland Post | 2022 October 11 – Thai ram thlanglei, Ranong pengkomh ah Kawthoung khua in phungning loin a rak lutmi Myanmar rammi 15 cu October 10 zinglei ah an tlaih hna tiah Thai Police nih a thanh.

Ranong pengkomh, Suk Sanran hmunhma, Nakha khua pawngah a cung aa khuhmi mawṭaw pakhat in Myanmar rammi pawl phungning loin a phorh hna tiah thawng an theih caah October 9 zaan sml 11:00pm hrawng ah Thai ram, Ranong pengkomh hrambunh No. 2521 nih an tlaih hna hi a si.

Cucaah Phang Nga pengkomh, Khura Buri lei panh in a kalmi mawṭaw cu Thai rian ngeitu pawl nih lampi ah an kham hna i an check hna lioah phung lut lo Myanmar 15 an tlaih hna tiah a langhter.

An tlaihmi hna hi pa 9, nu 5 le Thai rammi mawṭaw mawngtu pakhat (kum 44) hna an si tiah theih a si.

Cu khual lam caah broker man baht 30,000 (sing 20 leng) an pek hna tiah theih a si.

Na ruahning rak langhter ve.. (Leave a comment)

%d bloggers like this: