Hakha peng kahdohnak ah ralhrang 35 an thi, CDF pakhat a nunnak a liam

Taal, Falam le Hakha kar khua - Photo: CHRO

The Chinland Post | 2022 March 10 – Chin ramkulh, Hakha lei ah a rak kaimi Kawl ralkap ralhrang pawl le Chinland Defense Force-Hakha (CDF-Hakha) karlak ah March 3-6 tiangah kahdohnak voi 3 a chuak i ralhrang 34 an thi, CDF-Hakha in mipi hriamtlai pakhat nih ram caah a nunnak a pek tiah theih a si.

Kalaymyo in Hakha lei ah a rak kai mi ralhrang mawtaw 27 le tank 2 cu Dokṭhek le Chuncung karlak ah CDF-Hakha nih March 3 ah bom in an kah hna caah ralhrang 8 an thi tiah an thanh.

CDF-Hakha nih kahmi bom nih fak tuk in a khen hna caah ralhrang pawl cu hmai kal ngam ti loin Dokṭhek ah an riak. Cun an hawile a thimi ralhhrang pawl ruak kha inn pakhat chungah an pawn hna i mei in an khangh chih hna. Cun, a dang Dokṭhek khuami inn 16 zong an khanghpiak hna tiah CDF Hakha cathanh chuahmi in theih a si.

March 3 ṭhiamṭhiam ah, Hakha lamruk tonnak gate a hngakmi ralhrang hna cu CDF-Hakha nih an kah ṭhan hna i leng a rak chuakmi ralhrang 1 a thi.

Ralhrang pawl cu March 4 ah tank hmaikal ter in an kal lio ah CDF-Hakha nih an kah ṭhan hna. Kahdohnak hmunhma a rem deuh lo caah CDF-Hakha cu ṭha tein kap thiam loin an kir ṭhan.

March 5 ah ralhrang pawl cu Chuncung khua pawng ah bom hmanhmi voi 8 an i lamh caah ralhrang 11 an thi. Ralhrang pawl cu hmai kal ngam ti loin lam cungah hmunhma an khuar. Zaanlei sml 7:00pm hrawng ah CDF-Hakha nih an pel hna i an kah ṭhan hna caah ralhrang 10 an thi chap tiah theih a si.

CDF-Hakha nih ralhrang pawl cu March 6 ah Chuncung le Hakha kar ah an kah ṭhan hna i 3 an thi. CDF-Hakha nih bom an hmanh takmi cu ralhrang nih bom kawlnak (mine detector) in an theih khawh caah hmai kal ngam ti loin Hakha rungtlang ummi LIB 266 ah bawmh an hal hna. Bawmtu ah an rak thlahmi hna cu Hakha thar lonh ah CDF-Hakha nih an kah hna i 2 an thi tiah CDF-Hakha nih March 9 ah a thanh.

Ralhrang pawl cu an kalnak lamthluan ah in 18 an khangh i Pastor pa inn pakhat aa tel, nu pakhat nih hliamhma a tuar tiah thawng theih a si.#

CDF Cathanh: 

Na ruahning rak langhter ve.. (Leave a comment)

%d bloggers like this: