Hakha Sang Thar Samh Mi Le Inn Thehpiak Ding Ti Mi Kong Ah Ramngei Hna Nih lamzawhnak an tuah 

Hakha Cawbuk Hmunhma Lungtlinlonak Langhter/ TCP

Salai CungCung|2019 August 1| Chin ramkulh cozah nih Hakha Sang thar samh mi , inn thehpiak ding le Upadi ning in a kal lo mi Vuanci pawl kan thlenpiak uh ti mi kong ah Hakha Pupa ramngei aa timi hna nih July 31 ah Hakha khuathar Thantlang lampial in Vumthumaung certual tiang duhlonak lam zawhnak an tuah tiah kan theih.

“A tu lam kan zawhnak a ruang cu, abik in vawlei kong hi a si. Kan Chinram hruaitu kan upa hna nih upadi cauk zong an ngei dih ko nain upadi ning in an zul lem lo. Sangthar samh ding an ti mi ah Sipin Area a kau tuk in an lak. Hakha ah hmun lawng tampi a um ko, mi Inn le Lo sak cia mi hrawh piak loin hmun dang tu an kawl awk a si. Kan nih Hakha mi cu mehhang hna  mah tein aa cawk kho mi lomi kan tam caah mah le dum chung chuak mi te kan ei, cun dawr hna zong ah aa cawk kho lo mi tampi kan um. Kan paw cawmnak caah kan tuah lio mi kan hmun chuh in le hrawh piak ding in ruahnak an ngei hi cu zapi kan ngeih a chia tuk. Chin ramkulh chung ah hmun lawng vawlei a um lo, pupa ram zong a um lo ti in kan hruaitu hna nih an kal pi mi hi kan duh lo, kan lung a fak caah tubantuk in duhlonak langhter ding in lamzawhnak kan tuah hi a si” tiag lawzawhnak ah ai tel ve mi nu upa pakhat nih  The Chinland Post ah a chim,

Hakha Cawbuk Hmunhma Lungtlinlonak Langhter/ TCP

“ Kei hi Thantlang in a ra mi ka si. Hi ka ratnak a ruang cu, Thantlang ah ka hmun pungsan 105 le 106 ka ngeih cang mi cu hramhram in Sipin pangpar dum caah a kan lakpiak. Kan inn ah rak ra in zeihmanh tonnak le ceihkhannak um loin an duh poh in kan hmun cu an cawh. Cu tik ah kei mah pumpak in tlangtlatu hna sin ah ka va kal i hi kong he pehtlaih in zeihmanh lungrethei in um hlah uh a thatthatnak in kan in ruah piak hna lai a kan ti. Nain tu ni caan tiang zeihmanh vawlei hmun zong a kan pek lo. Thantlang khuapawng  zong ah vawlei lawng mi pakhat hmanh a um ti lo. Kei hi (Mesayin) zung ah ka rak tuan bal, cu lio ah cun Dum ka ngei, cu Dum cu kum 20 leng kan tuah cang mi a si. Ka nu le ka pa innhmun an rak chuh piak mi ai awk in  hi ka ka hmun te cu rak ka pe ko uh ti ka hal hna, nain a kan pek lo. Thantlang ah hin kei mah lawng si lo in adang dang zong hi bantuk a tong mi an um rih.2012 lio ah hin pungsang 1 in Dum le Lo kan ngei, tu ah punsang 2 in kan thleng piak uh kan ti hna tik ah tangka a pek kho lo mi cu pungsang 2 in a kan thleng piak duh lo. Cucaah hi kong he pehtlaih in kei mah hi Thantlang in a ra mi ka si” tiah Pi Mang Hlei Iang nih The Chinland Post ah a chim.

“Tu ni ah duhlonak kan langhternak a ruang cu,  Laitlang chung ah vawlei hmun lawng a um lo, Laitlang cu Pupa vawlei le hmun ngei mi kan si. Zeicadah Pupa ram a si ti ka chim khawh ti ah cun Lairam ah zei miphun hmanh rat in Lairam hi an rak derh mi a si lo. Laimi kan pupa hna nih an mah kut tein an rak sak mi le an rak derh mi a si. Kan nih Laimi phun cu kan thih tik siseh, nupi va ngeih tik siseh, vawlei in man le ro hi rak pek tawn a si. Cucaah kan pupa chan in ni hin ni tiang ah Laimi pupa ram ngei tampi an um, Cu hmun pawl cu kan cozah lei zong nih theihpi nak kan ngei ve hna seh law ti kan duh. Lairam ah hin vawlei lawng a um lo, pupa ram a um ti hi kan theih pi hna seh tiin lamzawhnak kan ngei hi a si” tiah Upa pakhat nih zapi tonnak Chin Media sin ah a chim.

Hi lawmzawhnak kong he pehtlaih in Pi Za Tlem nih “ tu ni duhlonak langhter in lamzawhnak kan tuahnak a ruang cu, kan sin ah upadi cauk pawl kan ngeih dih ve ko, a hnu bik chuak 2019 upadi zong kan ngei. NLD cozah nih vawlei hmun chuhnak kong he pehtlaih in zapi ai tel dih. Chin ramkulh cozah nih Upadi ning in a kan tuah piak lo caah tubantuk in lamzawhnak dirhmun tiang kan phannak hi a si. Hi Upadi ning in vawlei hmun le lo ngei hna kha tha tein tonnak ngeih hnu ah vawlei chuh ding a si ah cun lak piak siseh ti in aa tial. A sinain Lothlo pawl hi zeihmanh tonnak an ngei hna lo, cozah lei nih tonnak a kan ngei te ko lai tiah Lothlo hna nih an hngak ko hna, nain tu ni tiang ah zeitonnak hmanh a um lo. An auh hna i ralring peknak lawng te an tuah hna. Inn le lo na hrawh lai ma, hrawh lo cun JCB in hrawh piak nan si lai tibantuk in an tlerh hna. Cucaah Lothlo hna nih inn le lo hrawh piak an duh lo caah tubantuk in lamzawhnak kan tuah hi a si” tiah a chim.

Hakha Cawbuk Hmunhma kauh Lungtlinlonak Langhter/ TCP

Hi lamzawhnak ah biatlang phun 16 in an au, Chin nunphung ning in Lo le thlam sak mi kan theh kho lo, Hakha khua 43,90 square miles Sipin Area kauh mi kan duh lo, Upadi zulh loin riantuan mi minister pawl kan duh lo kan thlenpiak uh, Lothlo le sifak vawlei zuar in ram thanchoter kan duh lo, Chinram ah vawlei a lawng mi a um lo-pupa vawlei lawng a um, vawlei hmannak upadi he aa tlak in zohfelnak a um lo i upadi he aa kalh in nawlngeihnak hman mi ngol cang uh, Chin nunphung le nuhrin covo upat ding, vawlei kong upadi ning tein Myanmar ram ningpi in an zulh nain Chin ramkulh cozah nih an zul lo, rammi nih pek mi nawlngeihnak kha mah hlawhnak caah hmang hlah, rammi duhnak in upadi nih khulhchilh ding,1994 kum vawlei upadi ning in khulhchilhnak, upadi ning loin Hakha khua sersiamnak rian kan duh lo, Vawlei chuh mi a ngeitu sin ah rianrang tein pek than ding, Chinmi covo kilven ding, Lothlo hna khuasaknak thanchoter ding le ziknawh eihmuarnak hloh ding tiah an au pi a si.

Leave a Commnet

%d bloggers like this: