Hakha Sangthar Samhmi Inn Hmun Kong Ah Mithmai Maw Kan Zoh Lai Dinnak Dah Kan Tanh Awk A Si?

0

The Chinland Post| 2018 February 24| Hakha ah inn ngei lo 1000 fai kan um, thih lo tong usih law ruaksuannak ding hmanh ngei loin Hakha ah kum 10 leng khua a sa cangmi miharsa le nuhmei ngaktah zong tampi um a si. Inn ngei lo harsatnak zor ter dingah kan cozah nih rampi cozah bawmhnak pia khat hmanh tel loin sang thar samhnak khua an kan khanpiak i lawmh lo awk a tha lo.

Sihmanhsehlaw thil tha chung in thil dawhcah lo tete a um tawn bang tutan ah thil ning cang tein a kal khawh nak ding sang chung ah dingthlu lairel upa tiin thimmi hna nih mithmai zoh in mah chungkhat tanhnak le committee nih a sok kho ding tiin rikhiah mi pali chung ah aa tel lo buin tenh chih mi zong an um pah len i mizapi lei kap zong in inn a ngei ko bu in a sok mi le inn hmun a ngah mi an um pah len tiah hun theih a si tikah lung a nuam lo ngaingai.

Inn hmun sok kho ding in tuanvo ngei nih ri khiah pali an ser mi cu: (1) Inn a ngei bak lo, inn hlang in Hakha ah kum hnih nak tam a um cang mi. (2) Inn ngei lo mi harsa nuhmei (nu nih chungkhar a hruai i fa le he inn hlang in a um mi). (3) Hakha ah a ummi Pastor inn ngei lo. (4) Cozah rian tuan in pension a la mi inn ngei lo an si lai ti a si.

Mizapi lak zong in inn a ngei ko na bu in hmun a sokmi um len a si ti theih hi cu thling a kik pah. Hakha ah kan mithmuh ah inn siseh hmun siseh a ngei lo i zeitik ah hmun aa cawk in inn a sa kho hnga ding ah ruah ngam awk a har ngai mi kan inn pa chakthlang miharsa an tampi lio ah dawr nganngan a ngei i inn tha tha le motor he a um mi hna nih zeiti maw in an inn chungkhar milu cazin an tawlmer i hmun an sok mi hna hmuh a si tikah ning maw a zak deuh lung dik a fak deuh. Inn hmun a ngah mi chung zongah um pah len dawh an si. Nuhmei timi hi pasal nih thihtak mi maw aa then mi ti khi an si i cu hmanh ta le pa zohkhenhtu tha ngei lo le fale he a hmei mi khi dahkaw Laimi nih nuhmei ngaktah kan ti hna cu. Ta le mi rumrum he khuasak ko, pasal a ngei bal zong silo, kum 40 hmanh a tling rih lomi mi duh tong law hni thlen hmanh i cuh loin va ngeih aa thawh ding mi hna nih nuhmei dirhmun inn ngei lo mi harsa tiin inn hmuh sok ve hi cu a poi ngai te.

Cu nak hmanh in ningzak zong a si i lung zong a fak taktak mi cu inn a ngei ko mi pastor pawl nih hmun nan sok mi le zeiti maw in nan nupi le min hna inn hmun nan sok mi hi a si. Tutan ah mee a zuk ding in cohlan mi pastor 84 an si. Cu chung in minung 21 nih hmun an ngah. Hi 21 chung ahhin pastor tak tak zong a si lem lo mi le inn zong a ngei ko mi tibantuk hna i tel dawh zong in theih a si. Pathian chang ah chiah mi tukhal rian a tuan mi Pastor te hmanh nih hi bantuk in khua an ruah cang ahcun mizapi chin chin cu zeidah kan lawh hnga mu.

Hi bantuk in ningcang loin thil a kal sual nakhnga lo sipin committee lawng nih sang chung minung sining an hngalh dih lo caah sang kip in dingthlu lairel a si bik lai tiin bochanmi nu le pa pawl le sangkip inn hra aiawh, inn 100 aiawh le khuabawi pawl mah le sang cio min cazin chekfeltu ah bochannak nganpi he tuanvo pek an si. Cheukhat upa cu rikhiah mi phunli chung ah a lut kho bak lo ti hngalh ko buin mah rualchan chungkhat sahlawh zong tenh len dawh an si. Kanmah nih midang lam kan hmuhsak hna lo ah zeitindah mizapi cu lam ding ah kan hruai khawh hna hnga?

Mizapi leikap in tuanvo nganpi kan ngei ve. Committee nih minung 810 kha mee zuk ding in an pom i mizapi sinah an thanh. Cu an thanhmi cu ni sarih chungah a lungtling lomi nih chimrel khawh a si. Ni sarih chungah nan chim rel lo ahcun mumai ding tein kan kal cang lai i hohmanh nih dohkalh khawh a si ti lai lo tiah phungning tein thawng an thanh. Cu lio ah ho hmanh nih mee a zuk ding in committee pom mi cazin kong ah chimrelnak a um lo.

Sihmanhsehlaw committee fehter ning tein mee zuh ter a si i a ngah mi le ngah lo mi a hun i fian hnu lawngah a ngah lo mi pawl nih a ngah mi chung in anih cu inn a ngei ko ee, nuhmei a si lo ee, pastor ngai a si lo ee tibantuk pawl kha bia a hung leng len. Cu nih cun tuanvo ngei committee kha rian tuan fello a phawt cang hna. Anmah lei kap in thil a ningcang tein a kal khawh nak ding ah mizapi lei chimrelnak nawl phungning tein an kan onh lio ah khan mizapi nih kan hngalh mi kong kan rak chim ding kha kan rian a si. Cucaah hmai leiah inn hmun thar samh le mee zuh tibantuk a si ah cun mizapi nih biatak tein thil a dikfel mi a chuah khawh nak ding tan kan lak a herh. Pumpak duhlo le huat lai tih ah thil dik tanh in thil dik lo kan doh ngam lo chung paoh cu kan thangcho lai lo i kan khua kan ram ah dinnak a leng kho lai lo.

Cun tutan i inn hmun a ngah mi pawl zong cabinet ah zoh le a dik tak tak mi si lawng ah fehter ding a si caah mizapi lei kap in a dik lomi thil kan hngalh mi a um ahcun chimphuan ding ah caan kan ngei rih. Committee tuanvo ngei sinah chim khawh a si, hohmanh nih a chimphuang tu min langhter tibantuk a um lai lo. Hibantuk in thil dik lo dohnak ding ah caan a um lio ah chimrel lem loin a luan hnu ah riantuan tu upa mawhchiat timi kan lungput le sining hi kan kal tak i dinnak caah raltha tein kan dir ngam a herh cang.

About The Author

Na ruahning rak langhter ve.. (Leave a comment)

%d bloggers like this: