Hakha Sii-innpi Ah Kal I Tawl Khawh A Si Cang
Tawk Tling Thang| 2019 June 17| Chin ramkulh khualipi Hakha sii-innpi ah June 17 thawk in Kal (kidney) i tawl khawh a si cang, minung pakhat zong an tawl colh cang tiah kan theih.
Hakha sii-innpi ah Kal tawlnak seh pahnih an chiahmi cu June 17 zingka suimilam 10:00 ah Chin ramkulh minister Pu Vui Kaw, Hluttaw Speaker Pu Zo Bawi, Chin ramkulh cozah bu secretary, Chin ramkulh ngandamnak zung lutlai, pengkomh zung lutlai in upa tampi tel in Kal Tawlnak seh hunnak le hmuhsaknak an tuah cang.
Hi kong he pehtlai in Hakha Khuanu Khuapa in Pu Ral Kham nih, “Tu zingka, Hakha sii-innpi ah kal tawlnak seh hunnak kan tuah cang. A hmasabik ah Yangon ah voi tampi aa tawl bal cang nain a dam rih lomi Pa Thawng an tawl hmasabik. Kal tawlnak seh hi pahnih a si caah voikhat tawl ah minung pahnih tawl khawh a si lai i a tlawmbik suimilam 4 chung a rau lai. Nikhat ah minung 4 tluk lawng an i tawl kho rih hna lai. Yangon le Mandalay ah kal hau ti lo in Hakha ah Kal tawl khawh a si cang cu lawmh a um tuk hringhran” tiah The Chinland Post ah a chim.
Kal tawltu ding riantuantu hna zong Yangon ah tlamtlingte in an va cawng i atu cu Hakha sii-innpi riantuan ding ah timhcia an si cang. Hi kal tawlnak caah a herhmi ti zong tlamtlingte in an laak dih cang. Kal tawlnak he pehtlai in zei maw te a herh chapmi tete a um rih i cu thilri cu Hakha Khuanu Khuapa nih damhpiak ding in bawmh an hal hna tiah kan theih.
Myanmar ramchung ah Kal tawhnak seh hi ramthen kip ah an chia kho rih lo. Mi tampi cu Yangon le Mandalay ah an i tawl cio. Yangon le Mandalay ahcun voikhat tawl man ah ks. 80,000 in 100,000 kar hrawng a si. Atu cu Yangon le Mandalay ah kal hau ti lo in June 17 thawk in Hakha ah i tawl cio khawh a si cang.
About The Author
