HBA Mino Nih June 1 Ah Hakha Khuapi An Thianhhlimh Lai

TCP-Hakha| 2019 May 27| HBA (Hakha Baptist Association) Youth Department hruainak in aralaimi June 1 (Zarhte ni) ah Hakha khuapi chung le HBA ramchung vialte hmunthur char le thianhhlimh a si lai tiah kan theih.

“HBA nih June thla zarhkhatnak paoh hi Pawngkam kilvennak (Ecology Sunday) Sunday tuah lengmang a si. Cu ruang ah kan pawngkam zohkhenh kilvennak le thianhhlimhnak rian i hmaithlak in 2018 in Ecology Sunday lai fate hmunthur charnak le pawngkam thianhlimhnak kan ngei peng. Tukum zong June 1 ah kan ngei than lai. Khuapi chung si lo in khuate lei zong an biakinn pawng, khuachung  lam, thlaan, thlacamnak hmun tibantuk an rak thianh cio lai. Hi ni ah mino vialte pawngkam thianhhlimhnak le kilvennak rian ah rak i tel cio hna usih” tiah HBA- Youth Secretary Pastor Van Tling Thang nih The Chinland Post ah a chim.

HBA mino nihhin Hakha khuapi chung zatlang lam, khuacuanhnak, thlacamnak le thlaan hmun tibantuk hi thla fatin thlakhat ah voikhat cio town churches-Khrihfabu tuanvo pek in an thianhhlimh zungzal. Atu May thla hi Olive Baptist Church mino nih Henry Van Thio Parthlam umnak hmun khuacuanhbo (view point-1) an thianhhlimh. Cu bantuk in aralaimi June thla hi Hakha Thar Baptist Church mino nih Hlawhtling Thlacamnak tlang an thianhhlimh lai tiah kan theih.

HBA ramchung ah Khrihfabu 55, inndong 5199, pastor zapi 149,  member zapi hi 24086 (CBC 2019 Triennial meeting) an si.

Leave a Commnet

%d bloggers like this: