Hluttaw Ah Media Luh A Phittu Hi Keimah Ka Si; Hluttaw Speaker Pu Zo Bawi

City Hunter| 2018 January 25| NLD cozah thar kai hnu in Chin ramkulh hluttaw tonpumhnak ah nihin ni tiang Chin media pawl thutdan an pe in thawnglaknak nawl an pe rih hna lo. Hihi, Chin ramkulh hluttaw Speaker khamnak in a si tiah kan theih.

Chin ramkulh hluttaw tonpumhnak ah cozah lei thawngthanhtu (pian-cia-zi) media lawng thutdan an pek in thawnglaknak nawl an pek hna. Tualchung media le media dangdang cu tonpumhnak chung ah thutdan pek le thawnglaknak nawl pek an si lo. Meeting thawk lai te le a dih lai te tibantuk ah khin minute pakhat chung tluk hmanthlaknak nawl lawng an pek tawn hna tiah Chin media thawnglatu cheukhat sin in kan theih.

Hi kong he pehtlai in The Chinland Post nih 2017 May thla ah Chin ramkulh hluttaw Speaker cu a zungkhan i ton biaruahnak kan ngeih lio ah atu bantuk in a chim.

“Hluttaw meeting cu ram caah a biapimi ceihmai, khuakhan lairelnak hmunhma a si. Cuti khuakhan lairelnak ngeih lio ah thawnglatu media pawl hluttaw palai lakah an camera he an i chawhvahmi le an cawlcanghmi khi mit thla an phor. Khuaruah tuaktaan khawhnak a kan donh. Cucaah, lungdaite in hluttaw palai hna nih khuakhan lairelnak kan ngeih khawhnak ding saduhthahnak he media pawl hi a chung ah luhter ti hna hlah uh. Chikkhatte hmanthlaknak nawl lawng pe cang hna u tiah tuanvo ngeitu ka ti hna ruang ah media pawl a chung ah thut in thawnglaknak nawl an in pek hna lonak hi a si. Phundang in cun keimah nih hluttaw tonpumhnak chung ah media pawl luh kan kham hna bia a si” tiah a chim.

Cozah lei thawnglatu vial cu a chung ah thutdan (media corner) nan tuahpiak ko hna cu ta. Kannih zong anmah thutdan pawng a hnulei bik ah thutnak pek awk kan tha ve lo maw? Cun, a hmai ah chuah le cawlcangh lo in local cable TV live hmang in asiloah facebook live in kanmah Chin media nih kan thlah lai? Cucu tah na kan onh kho lai maw tiah The Chinland Post nih kan hal chap than.

“Atu hika hluttaw tonpumhnak khaan hi cu a bi tuk. Na kan halmi cu kan onh kho rih hna lo. Hluttaw zung thar kan sakmi ah media corner kan in tuahpiak hna lai i cu tik lawng ah zalongte in thawng nan laak khawh te lai. Hluttaw zungthar kan sakmi kan lim hlan chung paoh cu hluttaw ah zalongte in thawnglaaknak nawl pek nan si rih lai lo, kan in kham rih ko hna lai” tiah a kan leh than.

Hi kong he pehtlai in Chin ramkulh hluttaw haotu chang U Aung Taan nih, “A langtlang phone chawnhnak men in thawngpang kan hal hlah uh. Hluttaw thawngpang theih le hngalh nan duh ahcun hluttaw tonpumhnak ah ra u law zalongte in rak la ko uh. Kan in kham hna lo. Ramkulh le ramthen dang ahcun TV live hmanh in an thlah si. Hluttaw caanhmaan tonpumhnak ahcun zeihmanh thuhnawh awk a um lo caah zalongte in thawngpang laak khawh a si ko” tiah 2017 kum dongh lai hluttaw meeting an tuah dih hnu ah TCP ah a chim.

January 25 ah tuahmi Chin ramkulh hluttaw caanhmaan tonpumhnak ah The Chinland Post thawnglatu pahnih hluttaw thawngpang laak ding ah an kal i kutka cawngtu, hluttaw zung nih an luhter duh hna lo. Meeting thawk hlan te ah chikkhat te lawng an luhter hna nain hman an thlak manh hlan ah an chuahter than hna.

Kawlram chung ramkulh le ramthen hna ahcun Hluttaw zung meeting tuah lio i Media pawl thawnglak an sinah hna lo hmanhah (Meeting lio an hmantlakmi nih hna a hnawhter) a leng in Live thlahpiak in TV he an chiahpiak hna. Chin ramkulh hluttaw zung cu cozah thar a kai hnu in tuni tiang ah a chung i thawngpang lak cu chim lo a leng zong in Live he TV  chiahpiak kho rih lomi ramkulh pakhat a si ti kan theih. +++

Leave a Commnet

%d bloggers like this: