Hluttaw Nih U Win Myint An Fehter Cang Caah Pu Henry Van Thio Le U Myint Swe He President An I Cuh Cang Lai

0

City Hunter | 2018 March 23| March 23 ah tuahmi Pyithu hluttaw nih Pyithu hluttaw speaker hlun U Win Myint Vice President caah an thim i an fehter taktak ko cang. Cucaah, March 26 ah tuahdingmi ramkomh hluttaw tonpumhnak ah atu lio Vice President Henry Van Thio le U Myint Swe he President an i cuh cang lai tiah kan theih.

Pyithu hluttaw nih Vice President caah U Win Myint (NLD) le U Taung Aye (USDP) an chuahpi hna. Minung pakhat lawng chuahpi ding a si caah a thlithup mee thlaknak in an thim hna. Mee thlatu 304 lakah U Taung Aye nih mee 27 a ngah, hnonmi mee zapi hi 4 a si. U Win Myint nih mee 273 in U Taung Aye cu fak tuk in a tei caah U Win Myint cu Vice President caah an fehter.

Phunghrampi ning in Pyithu hluttaw nih Vice President caah an thimmi U Win Myint cu ramkomh hluttaw ah chuahpi ding in an fehter cang. Cucaah, Ramkomh hluttaw tonpumhnak ah atu lio Vice President a tuan liomi Pu Henry Van Thio le U Myint Swe he President an i cuh lai. Ramkomh hluttaw nih a thlithup mee thlaknak in an thim hna lai i mee tambik a hmutu kha Myanmar rampi President ah fehter a si lai.

Hi kong he pehtlai in Thantlang in Pyithu hluttaw palai Pi Ni Sui Lian nih, “Kannih NLD party nihcun Pyithu hluttaw Speaker hlun U Win Myint kan thim ko lai. Ramkomh hluttaw meeting cu March 26 ah tuahding in meeting auh kan si cang. Cucaah, President thimnak cu March 26 ah a si lai i khi tikah ahodah President a tling lai timi a fiang te lai” tiah The Chinland Post ah a chim.

VIce President Henry Van Thio

U Win Myint hi President U Htin Kyaw he rian an chuahtak ni aa khat, March 21 veve ah a si. President i cuh ding in atu bantuk in Pyithu hluttaw Speaker rian vialte a kaltaknak le a chuahtaknak hi a si tiah kan theih.

A luancia ramkulh le ramthen hluttaw speaker thimnak siseh, Chief Minister thimnak siseh, Vice President le President thimnak siseh Daw Aung San Suu Kyi nih anih chuak seh/tling seh ti a duhmi paoh kha an tling tiah theih a si. Cucaah, NLD palai veve a simi U Win Myint maw Henry Van Thio dah president a tling lai timi cu amah Suu Kyi cung ah aa hngat.

Vice President U Myint Swe

Cozah rian umkalning hoih cun Vice President Henry Van Thio hi president a si awk le U Win Myint tu hi Vice President a si deuh awk a si ti a ruatmi ramkhel riantuantu an um. Cu bantuk in Kawlram cu procedure ning in an i ukhruai lo caah U Win Myint hi President a tlinter ko lai, amah hi President a tling ko lai ti a zummi ramkhel cawlcangtu zong an um ve tiah theih a si.

About The Author

Na ruahning rak langhter ve.. (Leave a comment)

%d bloggers like this: