March Thla Chung Thantlang Pengah Kawl Miphun Minung Pahnih Lam Riantuannak In An Thi

Salai Elvis| 2018 March 23| Thantlang peng chungah Kawl miphun lamriantuannak in March thla chungah minung pahnih an thi tiah thawng kan theih.

 

March 22 Thantlang in khaan 14 tluk aa hlatnak Saisihchuak lam rian a tuanmi U Chit Maung (kum 30) cu Tuaihmawng a lawhnak ah pe 15 tluk a sannak in a tlak caah a lu, a mittlang le a liang hna ah fakngai in aa khawn caah cikhat teah a nunnak a liam colh.” tiah hi rian tuannak an uktu le a thimi a nupi hna nih an chim.

 

A ruak cu Thantlang sii-inn ah an zohfel dih hnu ah an khua lei ah an lanh pi. U Chit Maung cu Kalay Myo peng Nat-Kyi-kung khaumi a si.

 

Cu bantuk thiam in March 18 zanlei 2:30 tluk ah Aung Thi Ha (kum 22) cu Hmunhlah khua in Bawinu tipi tiang lam an cawhnak ah Bawinu tiva ti aah khawhnak ah a tlak sual ve caah a nunnak a liam. A dang aa khawnnak a um lo. A mah cu set-gyi(theng) mawng mi a si.

 

A ruak zong phungning in March 19 Thantlang sii-inn ah palek le siibawi hna nih zohfelnak an ngeih hnuah an khua lei ah an kir pi ve. Aung Thi Ha cu kawl miphun, Magway ramthen, Kung khuate mi a si tiah Thantlang palek zung cazin ning in theih a si.+++

Na ruahning rak langhter ve.. (Leave a comment)

%d bloggers like this: