Hope Blood Donor Organization Nih Mizaw Harsa Khun In Bawmhnak Sermi Minung 18 Chungah 7 An Dam

Salai Elvis| 2019 July 16| Hope Blood Nonor Organization (Hakha) nih mizaw harsa khunmi caah bawmhnak serpiakmi 2019 July 2 tiang ah minung 18 bawmh an si cang i cu chungah minung 7 nih damnak tling an hmuh tiah July 15 ni ah thanhca an chuah.

HBNO: Hope Blood Nonor Organization nih bawmhnak halpiakmi cu  zawnruahnak le dawtnak ngei buin ramchung ramleng dawtu hna thawhmi le kuatmi  chungin bawmh an si. Hi mizaw harsa khun bawmhnak cu a tingco tu mizaw hna nih a chuak zat ning tein minung pakhat nih a tlawmbik ah 500,000 in a tambik 8,500,000 tiin tin co a si. Mizaw bawmhnak halpiak mi chungah a tambik cu ngakchia deuh an si i minung 18 bawmhnak pekcang mi tangka dihlak ks. 42,644,285 a si cang tiah kan theih.

Atu bantuk in mizaw harsa khun bawmhnak pekmi minung 18 chungah a dammi 7, pumtling lo 1, a thimi 4 le thlop liomi 6 an um. Hi bawmhnak Programme cu a luancia 2017 March 22 in thokmi a si tiah Hope Blood Nonor Organization (Hakha) nih thanhca chuahmi ah a langter.

Hope Blood Nonor Organization (Hakha) cu 2004 kum in rak dirhmi bu a si i Pu Cung Hu nih a tawlrelmi bu zong a si. A bik in mizaw thi hlutnak, thihlu tu lila hna zong conglomh upat peknak, khawndennak kongah harnak tongmi bawmhchanhnak, mizaw harsa khun thlop bulnak caah bawmhhal piaknak le a dangdang chiatni, thatnak ah a cawlcangmi le Cozah nih phungning tein a theihpi mi bu pakhat an si tiah kan theih.

Leave a Commnet

%d bloggers like this: