Hramhram in uknak lak a si hnu ah kahdohnak voi 100 leng a chuak i SAC ralkap 400 leng an thi tiah CDF-Hakha nih a thanh
The Chinland Post | 2022 September 19 – Ralkap nih hramhram in uknak a lak hnu Hakha peng hriamtlai phu CDF-Hakha le SAC ralkap karlak ah kahdohnak voi 103 a chuak i SAC ralkap 419 an thi, 192 an i hliam tiah CDF-Hakha nih thawng a thanh.
September 9 ah tuahmi Hakha Township People’s Conference cathanh chung ah Hakha peng dothlennak tuanbia tawi kha an langhter chih.
CDF-Hakha nih khuachung kahdohnak voi 50 leng a tuah tiah a langhter i CDF-Hakha nih Hakha peng hmunhma i 90% cu kan tlaih khawh tiah an thanh.
Hakha peng chung ah SAC nih hramhram in a tlaihmi minung 337 an um i 309 an luat ṭhan cang nain 28 cu hren an si rih ko. SAC kut in mipi 6 an thi cang i mipi inn 27 a rawh cang pin ah SAC hriamngan ruangah mipi inn 3 a rawk tiah a thanh.
Hakha peng dothlennak cu Hakha Township People’s Conference biakhiahnak ning tein ṭhawng chin in tuah a si lai an thanh.
Conference i a biapi mi biakhiahnak pawl an thanh mi ah Chin miphun le Chinram hramhram in uknak le miphun ngan nih namnehnak chung in kan luat tiang dothlennak kan tuah lai i CNF/CNA he naihniam tein rian kan ṭuanṭi lai tiah a langhter.
CDF-Hakha Council cu Mie peng, Senthang peng, Zokhua peng le Hakha khuapi chung tiah hmunhma 4 fonh in dirh a si bantuk in dothlennak chungah CDF-Hakha Council nih cu hmunhma 4 cu phunglut tein a aiawh i adang zeibantuk hriamtlai le uknak phu hmanh dirh lo ding in a thanh.
Hakha peng chung i a hlan ah rak dirhmi dothlennak phu vialte cu People’s Conference nih phunglut tein a hnawh dih cang i CDF-Hakha Council he aa pehtlai mi phu pawl lawng phunglut an si cang tiah a langhter.
Cucaah adang dothlennak phu pawl nih Hakha peng dothlennak kong vialte caah CDF-Hakha Council lawng pehtlaih ding le zeibantuk midang phu hmanh pehtlaih lo ding in theihternak a tuah.
Hakha peng himnak, runvennak, uknak, biaceihnak le phung sernak rian vialte CDF-Hakha Council nih a tawlrel lai tiah an thanh fawn.
CDF-Hakha Council nih dothlennak caah a fehter mi phung ning tein a tawlrel mi kong pawl cu dothlennak ruangah a chuak mipi cozah nih a pehzulh lai i hnulei kong khirh ṭhan in sualphawtnak hna a tuah lai lo tiah a thanh.
About The Author
