July 25, 2024

Hramhram In Uknak Lak A Si Hnu Kum 2 Leng Caan Chung Ah ABFSU Siahngakchia 13 An Thi, 30 Leng Thong An Thlak Hna

0

The Chinland Post | 2023 July 11 — SAC nih hramhram in uknak a lak hnu 2021 February thawk in July 10 tiang Myanmar ramchung All Burma Federation of  Student Union (ABFSU) siahngakchia 13 an thi cang i thonginn le biahalnak ah a thi mi 2 an um tiah ABFSU nih an thanh.

A hnu bik thil a cang mi pakhat cu Bago pengkomh ABFSU Deputy Chairman Ko Khant Lin cu Daik U peng, Kyaikzakaw thonginn in kan ṭhial lai tiah July 7 ah an chuahpi i a thi tiah theih a si.

Cun adang siahngakchia a thi mi tam deuh hi hramhram in uknak lak a si hnu tuan deuh 2021 le 2022 kum hna ah a thi mi an si.

“Thong le biahalnak ah Ko Khant Lin le adang 1 an thi cang. Ko Zin Ko Htun zong biahalnak ah a thi” tiah ABFSU biachimnak nawl a ngeitu nih BBC ah a chim.

Cun siahngakchia 50 leng tlaih an tong cang i cu chung ah 32 hi cu thong ah a hren lio hna a si tiah theih a si. Tongthlak a tong mi hna hi thong kum 3 in nunchung thongthlak ding tiah biakhiah mi an um.

Nunchung thongthlak ding tiah biakhiah mi 3 le thah ding tiah biakhiah mi 1 an i tel tiah ABFSU nih an chim.

AAPP cazin ning ahcun hramhram in uknak lak a si hnu ah siahngakchia 125 an thi cang i tlaih a tong mi 1,206 an um i cu chung ah 716 cu an hren lio hna a si. Thongthlak ding in biakhiah mi siahngakchia 140 an um i thah ding tiah biakhiah mi 7 an um tiah theih a si.

About The Author

Na ruahning rak langhter ve.. (Leave a comment)