Laiza Headquarter A Rak Fuh Mi SAC Battalion 8 I Ralhrang Rual Pawl An Fak Ngai
Salai Mangpau | July 11, 2023 |
Kachin Independence Organization (KIO)/ Kachin Independence Army (KIA) Headquarter umnak Laiza khua pawng Nansanyang khua ah SAC ralkap bu tampi an hun kai tiah Kachin ralkap thawngzamhnak in theih a si.
June 16 ni ah Nansanyang khua pawng ah kahdohnak a um hnu ah July 3 ni in SAC ralkap battalion 8 minung tam pi an hun kai chap i nihin ni tiang kahdohnak a um peng. Ralhrang nih hriamngan nifatin an kah. A rak kai mi SAC lei kekal ralkap bu pawl cu Battalion 13, 17, 103, 236, 83, 77, 318, 385 tiah an zapi phu 8 an si.
“Lah-13/236/103 lei in a thi mi SAC ralkap an tam. A karlak ah in an tap. An chuak kho lo. Vanlawng Bomb thlaknak a um rih lo. July 8 zaan ah Vanlawng in Ei-din le kuan an tlak bawmh hna ” tiah KIA biachimnak nawl a ngeitu Colonel Nawbu nih fianhternak a chim.
July 6 Kachin ram, Waimaw peng, Nansanyang khuate lei ah Banmaw in thazang a rak chap mi SAC ralkap pawl KIA nih lam in an bawh hna i an kah hna tiah thawng theih a si.
SAC ralkap pawl Nansan khuate lei ah hriamngan an kah i vawlei lei in kahdohnak an tuah, Nansanyang hi Laiza he ramri aa peh mi an si caah Laiza lei an tlerhkhawn hna hi a si. Nansanyan khua hi ahlan ah SAC ralkap pawl nih hmunhma an khuarnak a si caah atu hi uk le tlaih khawh ṭhan an zuam. July 3 ah KIA nih SAC ralkap pawl an kah hram an thawk hna hi a si.
Kachin ram le Shan ram chung thawngpang pawl a langhter tawntu 7 Star New nih cun Kachin ram, Waimaw le Nansanyan khuate pawng July 3 kahdohnak ah SAC ralkap a thi mi an tam i SAC ralkap Machine Gun zuun 1, 60MM 1, MG zuun 1, MG dohnak 1 le meithal zuun 3 hna KIA nih an lak khawh i SAC ralkap ruak 2 zong an hmuh tiah an rak langhter.
About The Author
