Hramhram uknak hrawh cikcek ding in kahdohnak kan tuah lai tiah KNU, KNPP, CNF, NUG, ABSDF le CRPH nih an thanh
The Chinland Post | 2022 July 27 – Fascist hramhram uknak hrawh cikcek ding in kahdohnak kan tuah lai tiah KNU, KNPP, CNF, ABSDF, CRPH le NUG July 26 zaan ah cathanh an chuah.
Ralhrang SAC nih U Jimmy, U Phyo Zeya Thaw, Ko Hla Myo Aung le Ko Aung Thura Zaw hna cu an sualnak inter an si cang tiah July 24 ah thawng a thanh i cubantuk thil tuah cu upadi he aa kalh bak mi hramhram in mithah a si tiah an cathanh ah an langhter.
2021 February 9 Naypyitaw ah Ma Twai Twai Khiang cu meithal kuan taktak in a lu ah an kah hnu thok in nifatin phungning loin mithahnak a tuah lengmang mi hi ngaihthiam awktlak a si lo. Chan khat hnu chan khat in mipi a thah lengmang i a hleikhun in mi tlawm u a simi tlangcung miphun hna hramhram in a thahmi zong kan fehter tiah phufonh cathanh ah an langhter.
Ralhrang SAC he biaruahnak in a phi kan kawl khawh lai tiah ruahnak a ngeimi tlangcung hriamtlai le ramkhel lei party hna zong nih SAC dirhmun taktak i fian caan a si cang caah ramkhel lei party hna, dothlennak phu hna le ramchung ramleng Myanmar mipi hna nih lungrual tein hramhram uknak hrawh cikcek ding ah sawmnak a tuah.
Ramdang phu le hawikomh ram hna zong nih ramkhel sinning in a kal lomi SAC sualphawtnak le phikharnak hna tuah chin ding le dothlennak a tuahmi phu pawl hmual ngei tein bawmhchannak tuah ding bawmhnak zong an tuah chih.
Mipi dothlennak nih aa tinhmi cu Fascist hramhram uknak hrawh cikcek dih in Federal Democracy ramkomh ser ding timi kha dothlennak phu pawl kan zapi nih kan i tinhmi a si kha a fian tuk chin tiah an langhter.
Mipi zapi thazang, ramkhel lei, raltuknak lei, ramkhat le ramkhat pehtlaihnak lei, uknak lei a lamkip in Fascist hramhram uknak a rannak in kan hrawh khawhnak hnga hnukir loin lungrual tein kan doh rih ko lai tiah biakamnak zong an tuah chih.
About The Author
