HTPH & IDPs MC Implementation Director he Biaruahnak (Interview)

The Chinland Post| 2022 February 21 — Hakha Township Pubic Healthcare & Internally Displaced Persons Management Committee (HTPH& IDPs MC) in Implementation Director a tuan cuahmah lio mi Zion Tipil Khrifabu, Hakha in Rev. Ni Cung Thang cu Chinland Post nih tulio mizapi caah ngandamnak siseh, kahdohnak ruang ah zaami hna kong he pehtlai in biahalnak kan rak ngaih.

Hakha Christian Ministers Fellowship (HCMF) le Hakha Baptist Association’s Minister Council (HBA MC) nih thluachuah pekmi HTPH&IDPs MC ah ka mother Church theihpinak le dawtnak thawng in Implementation Director a tuan lio mi ka si tiah The Chinland Post ah a chim.

“Kan committee riantuannak kong mizapi sinah langhternak caan tha nan kan pek caah kan i lawm tuk. Hi rian sunglawi tuk, minung hawi nunnak chanhnak rian ah a lam kip in thazang a chuahtu le dirkamhtu ramchung ramleng dawtu pumpak le bu kip cungah lunglawmhnak tampi kan ngei” tiah Rev. Ni Cung Thang nih a chim.

A tanglei ah, an riantuanank kong tlamtling rel khawh a si.

Chinland Post: Hakha Township Public Healthcare & Internally Displaced Persons Management Committee hi zeitik in dah dirh a si, ho nih dah a dirh i zeiruang ah dirh a si na kan chim kho hnga maw?

Rev. Ni Cung Thang: Nihin vawlei minung a that cuahmahtu Covid-19 zawtnak pulrai chungin kan miphun kan i kilven khawh i nunnak chanhnak rian kan tuan khawhnak ding caah le ral ruangah har tongmi rammi nih himnak le dornak kan hmuh khawhnak ding caah Hakha Christian Ministers Fellowship (HCMF) le Hakha Baptist Association Ministers Council (HBA MC) nih Hakha Township Pubic Healthcare & Internally Displaced Persons Management Committee (HTPH& IDPs MC) cu June 24, 2021 ni ah thluachuah pek in dirh a si.

Chinland Post: Chungtel pa zeizah nih dah riantuan a si i zaanghlei cawitu (volunteer) pa zeizah nih dah tuan a si cang?

Rev. Ni Cung Thang: Main Committee 16 thithruainak le lamhmuhsaknak tangah a tanglei zaanghlei cawitu minung thazang he riantuan a si.

1. Ambulance service ah minung 4, X-ray team ah 5, Oxygen supply ah 7, Community Care Center 1 ah 12, Community Test Center ah 6, Community Care Center 2 ah 15, le medical student 16 le Volunteer office ah 9, zapi fonh volunteer minung 74 nih zaanriak in thla 5 chung riantuan a si.
2. Zawtnak a zual lingcing ah runvennak rian cu khuachung ah minung 15 le khualuh hauka ah 15, zapi fonh volunteer minung 30 nih alaang in nifatin riantuan a si.
3. Zarhkhat zarhhnih in tuanvo i pek a si i tu ni tiang Khrihfabu mino minung 341 nih zaanghlei cawi in riantuan a si cang.

Chinland Post: Zaanghlei cawitu (volunteer) tirawl kongah zeitin dah nan tawlrel?

Rev. Ni Cung Thang: Thaithawh le zaanriah caah HCMF nih thlathum, Save the Children-Hakha nih thlakhat, GRET-Chin nih thlathum le ramchung ramleng dawtu dangdang nih thlakhat tuanvo an kan lak. Nikhat ah sml 24 chung riantuan a si caah thawhhlam le chuncaw le zaancaw hi cu CORAD nih thlathum le SCLR nih thlakhat tuanvo an kan lak. Hakha khuachung ummi tirawl dawr tete nih thlakhat tluk an kan cawm. Chuankhinnak kongah HBA Staff nih thlali chung zaanghlei an kan cawi piak.

Chinland Post: Hakha Township Public Healthcare nih January 31, 2022 ni tiang zeibantuk rian dah hmaithlak in a tuan i mizaw zeizah dah nan bawmh khawh cang hna, details deuh in nan kan chim kho hnga maw?

Rev. Ni Cung Thang: Covid-19 zawtnak pulrai kan tei khawhnak ding caah a tanglei langhter mi rian pawl hi i hmaithlak in tuan a si i a tanglei mizaw zat hi kan bawmh khawh hna.

1. Motor in mizaw donnak le thlahnak rian, le mithi ruakfimnak rian kan tuan. Covid-19 mizaw le lungrumhmi mizaw zapi 1789, Covid-19 mithi phorhnak ah motor voi 175, Mizaw dang 202, Mithi dang 55, zapi fonh minung 2189 bawmh an si. Hakha khualeng ah mizaw donnak le thlanak le mithi ruak fimnak rian tuan a si i voi 120 bawmh an si cang.
2. Covid-19 mizaw test nak rian kan tuan. Test mi zapi 2362 an si.
3. Community Care Center 1 (No. 3. BEHS) le Community Care Center 2 (Carson Hall) ah Covid-19 mizaw cawnghhramhnak rian kan tuan i mizaw 982 kan zohkhenhmi hna chungah mizaw 765 nih damnak an hmu, mizaw 24 cu cawnghhramh lio an si i mizaw 42 nih mual an kan liam tak.
4. Oxygen rawnhnak in mizaw bawmhnak rian kan tuan i Oxygen purity level 94% in 96% kar in Oxygen Cylinder 40L in CCC 2 caah dur 10175, Agape Clinic caah dur 700, Falam Siizungpi caah dur 200, khuate lei ngandamnak riantuantu bu le pumpak le Khrihfabu caah dur 1580, zapi fonh ah dur 12655 bawmh an si cang.
5. X-ray thlak herh mi mizaw 1178 (Covid-19 mizaw le mizaw dangdang) bawmh an si cang.
6. Runvennak rian cu a tanglei bantuk in kan tuan; i) City Market le Ral Dun Market luh/chuahnak ah screening gate ser in taklinh tahnak (thermometer laser gun) he mizapi damnak caah riantuannak, ii) khuachung lampi ah loud speaker le mask campaign he mizapi sinah fimchimhnak, iii) Hakha ah Lockdown tuah chung Town entrance gate hmun hnih ah check point tuahnak, Ral Dun le City Market dawr ngeitu vialte Test tuahnak, Outpass Card 15000 tuahnak le nikhat ah voikhat in card cheknak, iv) Zawtnak chawnhbarhnak (Chain of Transmission) chah khawhnak ding caah KMSS-Hakha he i bawm in mibu umnak hmun 8 (Agape Clinic, Volunteer Office, CCC 2, Ral Dun Market, City Market, Bus Station, Toll Gate le CCU) ah hand-washes stand tuah in kuttawlnak kheng 80 bunhnak, v) Hakha khuachung ah Covid-19 zawtnak in siseh Covid-19 zawtnak lungrumh bu in siseh mual a kan liamtak i ruakvui tu a ngeilomi mithi 31 ruak fimnak, vi) Rai khamnak si (Vaccine) aa chun rih lo mi ngandamnak lei riantuan tu, biaknak lei riantuan tu le zaanghlei cawitu Khrihfabu mino 1200 a voikhatnak sii chunhnak.

Chinland Post: Hakha khuachung si loin, a dang khua pawl tah zohkhenhnak a ngeih chihmi a um maw?

Rev. Ni Cung Thang: Covid-19 zawtnak nih fak tuk in a den mi khua pawl sin ah Covid-19 test nak le khuami ngandamnak zohkhenhnak rian cu a tanglei bantuk in tuan a si.

Chinland Post: DELTA le OMICRON an symptom an i khat maw? An i dannak zeibantuk dah an si?

Rev. Ni Cung Thang: Sibawite nih an kan chimh ning ahcun an i Covid-19 zawtnak chungkhar khat an si nain an virus min aa dang. An symptom an i khatnak le dannak tete cu a tlangpi cu a tanglei bantuk in a si.

Chinland Post: Mizapi nih hi Covid-19 zawtnak (Omicron virus nih a chuahpi mi) hi kan i runven khawhnak hnga zei pawl dah kan tuah a herh?

Rev. Ni Cung Thang: 

• Sibawite nih ruahnak cheuhmi zulh khawh i zuam peng ding.
• Leng chuah paoh ah Mask i huh peng ding.
• Chahpiat (or) Handgel in kut thiang tein i tawl peng ding.
• Zapi sin tlonlen le umthut tikah pakhat le pakhat pe 3 hlat in um peng ding.
• Mitkuh vuai tein ih khawh i zuam ding.
• Saa-dat le Vitamin-C ummi tirawl ei khawh i zuam ding.

Chinland Post: Mizapi sinah a dangdang cah le forhfial na duh mi um maw?

Rev. Ni Cung Thang: Thlariat chung zaanghlei cawinak ah ka hmuhtonmi chung in mizapi caah ka siaherhmi cu;

1. Covid-19 zawtnak pulrai hi cu khamnak sii (Vaccine) i chunh nak in tei a herh caah kanmah pumpak lungthlehnak in a tuan bik ah khamnak sii chunh khawh i zuam hna u si.
2. Zawt hnu ah i thlawp ding ahcun a dihheu mi suingun chawva a tam tuk lawng siloin minung thazang derthawmnak tamtuk a chuahpi chih caah zawt lo ding in pumpak cio nih i runvennak phung zulh khawh i zuam cio u si.
3. Zawt sual ahcun ni 5 hlan ah sibawi sin (or) sizung ah phanh khawh i zuam cio u si. Tuan tein sibawi sin (or) sizung ah aa thlawp mi nih damnak an hmu.

Kan peh than lai …. editor 

About The Author

Editor

The Chinland Post
Web & Online Editor cu Salai Za Bawi Thawng a si. Online Editor pehtleihnak Email: thechinlandpost@gmail.com, pabawijuly19@gmail.com

See author's posts