Indaw Peng, Mawteik Hmunhma Ni 2 Chung Kahdohnak Ah SAC Ralkap 8 An Thi, ABSDF Chungtel 1 A Nunnak A Liam Ve
The Chinland Post | 2023 August 29 — Sagaing ramṭhen, Indaw peng, Mawteik hmunhma ah SAC ralkap le All Burma Students’ Democratic Front (ABSDF) phu hna karlak ah kahdohnak a chuak i SAC ralkap 8 an thi, ABSDF chungtel 1 a nunnak a liam ve tiah Indaw Revolution – IR sin in thawng theih a si.
August 27 thawk in August 28 tiang Indaw khua in meng 8 aa hlatnak ah a um mi Mawteik khuate ah hmunhma a khuar mi SAC ralkap 60 hrawng le ABSDF hna karlak ah kahdohnak a fak, August 27 ah SAC ralkap 2 an thi i Indaw khuachung ah an ruak an phorh hna, kahdohnak chung ah 6 an thih kha mithmuh a si i ABSDF chungtel 1 a nunnak a liam i 1 aa hliam ve tiah theih a si.
Kahdoh a chuahnak Mawteik khuate chung ah Indaw hrambunh SAC ralkap nih hriamngan in 105MM an kah lengmang, Mawteik hmunhma ah SAC ralkap nih hmunhma an khuarnak hi a luancia thla 6 in a si cang i Mawteik, Yuatharya, Aungkone, Nantha, Pepin-Kyundaw khuate pawl in khuami 6,000 leng himnak hmun ah an zaam hi a rau ngai cang tiah Khit Thit nih a langhter.