Thla 4 Chung Ah SAC Chungtel 500 Leng CDM An Tuah
The Chinland Post | 2023 August 29 — Tu kum 2023 April thla thawk in July thla dongh tiang thla 4 chung ah SAC chungtel 500 leng nih SAC kaltak in CDM an tuah tiah NUG Ministry of Defense sin in thawng theih a si.
SAC an i uk ning, nawl an i pek ning a rawh thluahmah caah thla 4 chung ah hmunkip in SAC chungtel 500 leng CDM an tuah tiah MOD zung in biachimnak nawl a ngeitu Asst. Secretary U Mg Mg Swe nih nizaan thawngthanhnak ah a chim.
“Kahdohnak a fah chin lengmang bantuk in anmah chung nawl pek ningcang, an i uk ningcang zong a rawh thluahmah tik ah mipi sin ah aa fonh mi ralkap an tam chin thluahmah kha hmuh khawh a si. A luancia April thla in July thla tiang SAC chungtel 500 leng mipi lei ah an i fonh” tiah U Mg Mg Swe nih a chim.
Cun SAC ralkap chung ah Pha-ye-ti (ralkap thawngpang pawl a khawmtu) zong an tam chin thluahmah i cu hna pawl cu NUG nih rian a pek cio hna tiah a chim fawn.
SAC nih hramhram in uknak a lak hnu 2021 thawk in Kachin, Chin, Mon, Karenni, Shan, Sagaing, Magway, Bago, Taninthary hna ah SAC ralkap pawl cu NUG kuttang PDF pawl, CDF pawl nih fakpi in an kah thluahmah hna caah Byu-ha-hmu, Battalion Commander rank tiang a thi mi an um tiah theih a si.
Kahdohnak pawl le Operation pawl ah a kuttang ralkap pawl ṭha tein a uk kho lo mi ralbawi ngan bawi zong Min Aung Hliang nih rian a phuah thluahmah hna kha hmuh khawh a si.
About The Author
